Сречко Катанец Швецияга қарши ўйин ҳақида: «Айрим камчиликлар кузатилди, бироқ ўйиндан тўлиқ қониқдим»

Ўзбекистон миллий терма жамоаси бош мураббийи Сречко Катанец Швецияга қарши кечган ўртоқлик ўйинидаги мағлубиятдан (1:2) сўнг ўз фикрлари билан ўртоқлашди. Бу ҳақда «Championat.asia» хабар қилмоқда.

Ўйин ҳақида

Биринчи навбатда Швеция терма жамоасини ғалаба билан табриклайман. Ўйинга келадиган бўлсак, мен 7 кундан бери Ўзбекистондаман. Жамоа ушбу ўйинда кўрсатган натижадан қониқдим. Биз жуда яхши ўйнадик. Албатта, баъзи хатоларга ҳам йўл қўйдик, бу эса нормал ҳолат.

Жамоамизда ёш ўйинчилар жуда кўп. Энди бу ёшлар билан янги жамоа қуришимиз керак. Умуман олганда бизда бор ўйинчилар ва уларнинг ўйинидан қониқиш ҳосил қилдим. Келажакда ҳам шу руҳда давом этишимиз керак. Кучли жамоалар билан кучли ўйинлар кўрсатиш лозим.

Швеция терма жамоаси ҳақида

Бу жамоа бир неча йилдан бери юқори даражада ўйин кўрсатиб келмоқда. Бизга қарши иккинчи таркиб ўйнаган бўлса ҳам, улар жуда ажойиб ўйин намойиш қилди. Швеция бир неча кун олдин Испанияни мағлуб этди. Бу биз учун ажойиб тажриба бўлди, албатта.

Марказий ҳимоядаги хатолар ҳақида

Бунга нормал қарайман, ҳамма ҳам хато қилади. Улар бироз агрессивроқ бўлишини хоҳлаган бўлардим. Нафақат ҳимоя, балки бутун жамоа агрессив ўйнаши лозим. Мен кўрган камчилик айнан шундан иборат, яъни агрессив ўйиннинг йўқлиги.

Жамоамиз бир оз секин ҳаракат қилди, қанот футболчиларида ҳам айнан шу камчилик сезилди. Аммо қайтараман, жамоани ўйинидан тўлиқ қониқдим. Жисмоний тарафдан жуда кучли бўлган Швеция терма жамоасига қаршилик кўрсатиш ҳимоячиларимизга осон бўлгани йўқ. Мен уларни табриклайман. Ўйинимиздан хотиржамман. Ҳеч қандай хавотирланадиган нарса йўқ. Осиё ва Европада ўйин услублари ҳар хил, бизда бир оз секин футбол ўйналади. Ёш ўйинчиларга келсак, биз уларга кўпроқ имконият беришимиз керак, уларга ўсиш учун айнан ўйин амалиёти зарур.

Элдор Суюнов ва ҳозирда энг муносиб дарвозабон ҳақида

Тўғриси, аниқ билмайман. Ҳа, у бир нечта ажойиб сейвлар кўрсатди. Лекин жамоани тўлиқ ўрганишга улгурмадим. Миллий жамоа билан бир нечта машғулотлар ўтказдим, холос. Мураббий бирор қарорга келиши учун озроқ вақт керак бўлади. Дарвозабон ёки бошқа масалаларда бирор аниқ фикр айтиш учун етти кун жуда камлик қилади.

Швеция Испанияни ҳам 2:1 ҳисобида ютгани борасида

Ҳа, албатта, биз Испания билан бир хил натижа қайд этдик (кулади). Ҳазил, албатта. Швеция терма жамоасига келажакдаги ўйинларда омад тилайман. Улар бугун жиддий ўйин кўрсатди. Омад. Ҳаммага раҳмат.

Сречко Катанец, Ўзбекистон терма жамоаси бош мураббийи