Қашқадарё вилоятининг Китоб туманидаги Тахтақорача довонида 2021 йилнинг 6—7 сентябрь кунлари вақти-вақти билан йўл ёпиб қўйилиши маълум қилинди. Бу ҳақда «Дарё»га вилоят Фавқулодда вазиятлар бошқармаси ахборот хизмати раҳбари Соҳиб Ваитов хабар берди.
Қайд этилишича, шу кунлари Китоб тумани ҳудудидан ўтувчи М-39 Олмаота—Бишкек—Тошкент—Шаҳрисабз—Термиз халқаро автомобиль йўлининг 1135—1146-километридаги Тахтақорача довонида вилоят Фавқулодда вазиятлар бошқармаси томонидан махсус тактик ўқув машқи ўтказилади.«Ўқув машқи режасига кўра, ушбу автомобиль йўлида фуқаролар ва транспорт воситаларининг хавфсиз ҳаракатланишини таъминлаш мақсадида йўл атрофидаги кўчки ва тош қулаши хавфи мавжуд бўлган ҳудудларда тегишли муҳандис-техник тадбирлар амалга оширилиши белгиланган. Шу муносабат билан мазкур автомобиль йўлида вақти-вақти билан фуқаролар ва автотранспорт воситаларининг ҳаракатланиши қисқа муддатга чекланади», — дейди Соҳиб Ваитов.
Масъулнинг аниқлик киритишича, 6—7 сентябрь кунлари кунига икки ёки уч маротаба, 30 дақиқадан 40 дақиқагача йўл ёпилиб, қатнов тўхтатилади.
Изоҳ (0)