Germaniya O‘zbekistonga insonparvarlik yordami tariqasida 10 ming doza Casirivimab/Imdevimab kombinatsiyalangan preparatini yuborishi haqida xabar berilgandi.
Sog‘liqni saqlash vazirligi ma’lum qilishicha, Toshkent xalqaro aeroportida ushbu dori vositasi qadoqlarini qabul qilib olish marosimi bo‘lib o‘tdi.
Unda Sog‘liqni saqlash vazirligi mas’ullari, Germaniyaning O‘zbekistondagi elchixonasi xodimlari va jurnalistlar ishtirok etdi.
Ta’kidlanishicha, Casirivimab/Imdevimab (Shveysariyaning Roche farmatsevtika kompaniyasidan) COVID-19 ga qarshi sun’iy “antitanachalar kokteyli” bo‘lib, hozirda preparat virusning yangi shtammlariga chidamli yagona preparat hisoblanadi.
Tadqiqot natijalariga ko‘ra, preparat kasalxonaga yotqizish va koronavirusdan o‘lim darajasini 70 foizga kamaytirgani hamda kasallik alomatlarining davomiyligini 14 kundan 10 kungacha qisqartirgani aytilmoqda.
Bundan avval Shveysariya tomonidan O‘zbekistonga 1,1 milliondan ortiq tibbiy niqob yuborilgani, O‘zbekistonda koronavirus bilan to‘liq emlanganlar soni 1,9 million kishidan oshgani hamda xitoy—o‘zbek vaksinasining III faza tadqiqotlari natijalari e’lon qilingani haqida xabar berilgandi.
Izoh (0)