WSJ: O‘zbekiston AQShni afg‘on uchuvchilarini chiqarib yuborishni rejalashtirayotgani haqida ogohlantirdi

O‘zbekiston hukumati AQShni yuqori malakali afg‘on uchuvchilarini ularning oilasi bilan mamlakatdan chiqarib yuborishi haqida ogohlantirdi. Bu haqda 30-avgust kuni The Wall Street Journal gazetasi rasmiylarga tayanib, xabar berdi. Nashr buni “Tolibon” harakatining talabi bilan bog‘lamoqda, deb yozadi “Gazeta.uz”.

Gap bundan ikki hafta oldin Afg‘oniston Harbiy-havo kuchlariga tegishli vertolyot va samolyotlarda O‘zbekistonga qochib o‘tgan afg‘on uchuvchilari haqida ketmoqda. 16-avgust kuni O‘zbekiston Bosh prokuraturasi (keyinroq oxiriga qadar tekshirilmagani ma’lum qilingan) mamlakat havo makonini ichida 585 nafar afg‘on harbiy xizmatchisi bo‘lgan 22 ta harbiy samolyot va 24 ta vertolyot kesib o‘tgani to‘g‘risida xabar berilgandi. Kuzatuv davomida Embraer-314 va MiG-29 samolyotlari to‘qnashib, Surxondaryo viloyatining Sherobod tumani hududiga qulagan.

Ta’kidlanishicha, uchuvchilarni o‘qitish va afg‘on harbiy-havo kuchlarini yaratish bo‘yicha Amerika dasturi Afg‘oniston qurolli kuchlarini qo‘llab-quvvatlash borasidagi eng muvaffaqiyatli dasturlardan biri hisoblanadi. AQSh ushbu dasturga milliardlab dollar sarflagan.

Nashrning yozishicha, O‘zbekistonga qochgan afg‘on harbiylari “‘Tolibon’ning eng ashaddiy dushmanlaridan biri’ hisoblanadi, chunki ular o‘nlab yillar davom etgan to‘qnashuvlarda ko‘plab qurbonlar olib kelgan.

Shuningdek, “Tolibon” harakati O‘zbekistondan havo kemalarini Afg‘onistonga qaytarishga chaqirgan. AQSh Vakillar palatasining xorijiy ishlar bo‘yicha qo‘mitasi a’zosi va sobiq harbiy uchuvchi Avgust Pfyuger AQSh davlat kotibi Entoni Blinkendan uchuvchilarga yordam berishni so‘ragan.

“Eng yomon holatda ular Afg‘onistonga qaytariladi va o‘ldiriladi, ammo ularni noaniq taqdir kutmoqda deb aytgan bo‘lardim”, — deydi kongressmen.

AQSh Davlat departamenti mazkur holatga munosabat bildirgan: “Ularning uzoq muddatli xavfsizligini ta’minlash borasida mavjud barcha imkoniyatlarni ishga solgan vaqtimizda O‘zbekiston hukumati afg‘onlarni qabul qilishni davom etayotgani sabab minnatdorchilik bildiramiz”.

Avvalroq Germaniya Afg‘onistondan evakuatsiya qilingan 2 mingdan ortiq kishini Toshkent orqali olib chiqqani, O‘zbekiston afg‘on qochqinlarini qabul qilib, Surxondaryodagi chodirli shaharchaga joylashtirgani hamda afg‘onlar O‘zbekiston chegarasini qonuniy ravishda kesib o‘tishning ayyorona yo‘lini topgani to‘g‘risida xabar berilgandi.