Emomali Rahmondan Emmanuel Makrongacha. Bir qator davlat rahbarlari Shavkat Mirziyoyev va o‘zbek xalqini Mustaqillik bayrami bilan qutladi

O‘zbekiston Prezidenti Shavkat Mirziyoyev 30-avgust kuni Tojikiston prezidenti Emomali Rahmon bilan telefon orqali muloqot qildi.

Tojikiston yetakchisi davlat rahbari va birodar O‘zbekiston xalqini mamlakat mustaqilligining 30 yilligi bilan samimiy tabriklab, tinchlik-osoyishtalik, farovonlik va ravnaq tilaklarini izhor etdi.

Prezidentlar 2021-yil 10–11-iyun kunlari Tojikistonga oliy darajali tashrif yakunlari bo‘yicha qabul qilingan kelishuv va bitimlarning amalga oshirilishini ko‘rib chiqdi.

Savdo-iqtisodiy, investitsiyaviy va madaniy-gumanitar hamkorlik doirasidagi qo‘shma kooperatsiya loyihalarini o‘z vaqtida amalga oshirish muhim ekani ta’kidlandi.

Prezidentlar Afg‘onistonda harbiy-siyosiy keskinlik kuchayishi bilan bog‘liq mintaqaviy masalalarga alohida to‘xtaldi. O‘zaro muvofiqlashuvni kuchaytirish va yaqin idoralararo aloqalarni davom ettirishga kelishib olindi.

Bundan tashqari, yetakchilar 2021-yilning sentabr oyida Dushanbe shahrida o‘tkaziladigan Shanxay hamkorlik tashkilotining navbatdagi sammitiga tayyorgarlik ko‘rish masalalarini muhokama qildi.

Shuningdek, Shavkat Mirziyoyev 30-avgust kuni Abu-Dabi Amirligi valiahdi, Birlashgan Arab Amirliklari Qurolli Kuchlari oliy bosh qo‘mondoni o‘rinbosari Muhammad Ol Nahayon bilan telefon orqali muloqot qildi.

Abu-Dabi valiahdi Amirliklar xalqi nomidan do‘st O‘zbekiston Prezidenti va xalqini mamlakat mustaqilligining 30 yilligi bilan samimiy muborakbod etib, farovonlik, katta zafarlar va bardavom taraqqiyot tilaklarini izhor etdi.

Tomonlar 2019-yil mart oyida Birlashgan Arab Amirliklariga oliy darajadagi tashrifda erishilgan kelishuvlarni amalga oshirish doirasidagi ishlarning amaliy natijalarini katta mamnuniyat bilan qayd etdi.

Kuni kecha Masdar kompaniyasi bilan birgalikda O‘zbekistonda quvvati 100 megavattli ilk quyosh fotoelektr stansiyasi ishga tushirildi. Bundan tashqari, energetika tarmog‘ida yana oltita yirik loyiha amalga oshirilmoqda. Turli tarmoqlarda umumiy qiymati 5 milliard dollarlik 15 ta investitsiya loyihasini ilgari surish ishlari olib borilmoqda.

Boshqaruv sohasida kadrlar, axborot texnologiyalari bo‘yicha mutaxassislar tayyorlash borasida qator muhim dasturlar, gumanitar almashinuv loyihalari amalga oshirilmoqda.

Afg‘onistondagi vaziyat rivojlanishi yuzasidan fikr almashildi. Mintaqaviy xavfsizlik masalalari bo‘yicha faol muloqotlarni davom ettirishga kelishib olindi.

Bundan tashqari, Prezidenti Shavkat Mirziyoyevning Qirg‘iziston prezidenti Sadir Japarov bilan telefon orqali muloqoti bo‘lib o‘tdi.

Suhbat avvalida davlat rahbarlari ikki mamlakat mustaqilligining 30 yilligi bilan bir-birini dildan qutlab, birodar O‘zbekiston va Qirg‘iziston xalqlariga tinchlik, farovonlik va ravnaq tiladi.

O‘zbekiston bilan Qirg‘iziston o‘rtasidagi yaxshi qo‘shnichilik va strategik sheriklik munosabatlarini yanada mustahkamlashning dolzarb masalalari ko‘rib chiqildi.

2021-yilning mart oyida Toshkent shahrida o‘tgan oliy darajadagi uchrashuvlar chog‘ida erishilgan kelishuvlarni amalga oshirishga alohida e’tibor qaratildi.

Sanoat, qishloq xo‘jaligi, transport va logistika sohalarida aniq kooperatsiya loyihalarini, shuningdek, turizm va madaniy-gumanitar almashinuv dasturlarini ilgari surish maqsadida hukumatlar darajasidagi yaqin hamkorlikni davom ettirish muhim ekani qayd etildi.

Shavkat Mirziyoyev shu kuni Fransiya prezidenti Emmanuel Makron bilan ham telefon orqali muloqot qildi.

Ikki tomonlama va mintaqaviy hamkorlikning dolzarb masalalari muhokama qilindi.

Suhbat avvalida Fransiya prezidenti Shavkat Mirziyoyev va ko‘p millatli O‘zbekiston xalqini mamlakat mustaqilligining 30 yilligi bilan dildan qutlab, tinchlik-osoyishtalik, farovonlik, katta muvaffaqiyatlar va ravnaq tiladi.

Yetakchilar O‘zbekiston—Fransiya munosabatlarining amaliy jihatlarini ko‘rib chiqdi, xususan, 2018-yil oktabr oyida Parij shahridagi sammitda erishilgan kelishuvlarga muvofiq “yo‘l xaritalari”ning bajarilishini muhokama qildi.

Bugungi kunda Fransiyaning yetakchi kompaniyalari ishtirokida qazib chiqarish, energetika, sanoat, transport va kommunikatsiyalar sohalari, kommunal xo‘jalikni modernizatsiya qilish, turizm klasterlarini rivojlantirish va boshqa yo‘nalishlarda ustuvor loyihalar amalga oshirilmoqda. Fransiya taraqqiyot agentligi bilan moliyaviy-texnik hamkorlik bo‘yicha uzoq muddatli dastur qabul qilingan.

Birgalikdagi tashabbuslarni ilgari surish maqsadida 2021-yil may oyida Toshkent shahrida Hukumatlararo komissiyaning navbatdagi yig‘ilishi va Fransiya ishbilarmonlarining nufuzli delegatsiyasi ishtirokida biznes forum o‘tkazildi.

Bir qator qo‘shma madaniy tadbirlarni yuksak darajada o‘tkazish, shu jumladan, kelgusi yilning birinchi yarmida Luvr muzeyida mamlakatning boy madaniy-tarixiy merosiga bag‘ishlangan ko‘rgazmani tashkil etishga kelishib olindi.

Prezidentlar Afg‘onistondagi harbiy-siyosiy ahvolning keskinlashishi ta’sirida mintaqadagi vaziyatning rivojlanishi yuzasidan fikr almashdi. Mintaqaviy xavfsizlik va barqarorlik masalalari bo‘yicha hamkorlikni yo‘lga qo‘yish va almashinuvlarni faollashtirish muhim ekani ta’kidlandi.

Suhbat avvalida Germaniya prezidenti Shavkat Mirziyoyev va O‘zbekiston xalqini mamlakat mustaqillikka erishganining 30 yilligi bilan samimiy tabrikladi. Keyingi yillarda O‘zbekistonda demokratik yangilanishlar va ijtimoiy-iqtisodiy islohotlarni amalga oshirishdagi muvaffaqiyatlar alohida qayd etildi.

Muntazamlik kasb etgan oliy darajadagi muloqotning davomi sifatida ikki tomonlama hamkorlik masalalari yuzasidan batafsil fikr almashildi. Ko‘p qirrali munosabatlarning bugungi darajasiga yuksak baho berilib, istiqboldagi O‘zbekiston—Germaniya hamkorligining asosiy yo‘nalishlari belgilab olindi.

O‘zaro savdo va investitsiyalarni ko‘paytirish, ishbilarmonlik tashabbuslarini, Germaniyaning Siemens, Bosch, Man, Claas, Knauf va boshqa ko‘plab yetakchi kompaniyalari ishtirokida yuqori texnologik tarmoqlardagi sanoat kooperatsiyasi loyihalari va infratuzilmani modernizatsiya qilish dasturlarini qo‘llab-quvvatlashga alohida e’tibor qaratildi.

Prezidentlar O‘zbekiston maktablari va oliy ta’lim muassasalarida nemis tilini chuqur o‘rganish masalalariga alohida to‘xtaldi. O‘zaro gumanitar almashinuvlarni bundan buyon ham faol davom ettirishga kelishib olindi.

Davlat rahbari Germaniya prezidentiga respublikada koronavirus infeksiyasi tarqalishiga qarshi kurashishda ko‘rsatilgan texnik-maslahat ko‘magi uchun samimiy minnatdorlik bildirdi.

Afg‘onistondagi vaziyat yuzasidan ham fikr almashildi. Frank-Valter Shtaynmayer fuqarolarning O‘zbekiston orqali tranzit yo‘li bilan evakuatsiya qilinishida ko‘rsatilgan katta yordam uchun yana bir bor tashakkur izhor etdi. Birgalikdagi insonparvarlik operatsiyalarini amalga oshirish uchun yaqin aloqalarni davom ettirish muhim ekani ta’kidlandi.

Bundan avval Yevropa kengashi rahbari Sharl Mishel O‘zbekiston Prezidenti va xalqini mamlakat mustaqilligining 30 yilligi bilan tabriklagani, Shavkat Mirziyoyev Rossiya Senati raisi Valentina Matviyenkoni “Do‘stlik” ordeni bilan mukofotlagani hamda Shavkat Mirziyoyev O‘zbekiston mustaqilligining 30 yilligi arafasida 215 nafar mahkumni afv etgani haqida xabar berilgandi.