Ҳиндистоннинг Уттар-Прадеш штатида номаълум вирус келтириб чиқарган иситма туфайли бир ҳафтада 68 киши вафот этди, улардан 40 нафари болалар. Бу ҳақда маҳаллий соғлиқни сақлаш бошқармаси вакилларига таяниб, The Times of India хабар берди.
Бошқарма маълумотларига кўра, беморларнинг кўпчилигида баланд ҳарорат, сувсизланиш ва қондаги тромбоцитлар сонининг кескин камайиши кузатилган. Инфекцияга чалинганлар, шунингдек, денге безгагига ўхшаш аломатлар — мушак оғриғи, кўнгил айниши, бош оғриғи, лимфа тугунларининг шишиши ҳақида хабар берган.
Денге безгагининг асосий ташувчиси чивинлар ҳисобланади. Бу касалликка қарши вакцина йўқ, даволаш симптоматик воситалар ёрдамида амалга оширилади.
Номаълум инфекция билан касалланиш бўйича аксарият ҳолатлар Агра, Матҳура, Майнпури, Эта ва Касганж туманларида аниқланган. Фирозобод тумани эса энг кўп зарар кўрган (туманларнинг барчаси Ҳиндистоннинг Уттар-Прадеш штатида). Соғлиқни сақлаш бошқармаси ўтган бир кун давомида Фирозобод туманида яна 12 бола ушбу касалликдан вафот этганини, ҳозирда 72 бола касал эканини қайд этди. Туманда 1—8-синф ўқувчиларининг мактабга бориши тўхтатилди. Чекловлар 6 сентябргача давом этади.
Фирозободлик шифокорлардан бири Маниш Асижанинг айтишича, «туманлардаги вазият хавотирли». У касаллик тарқалишининг сабаби сифатида санитария ва гигиенанинг йўқлигини кўрсатмоқда. Шунингдек, Ҳиндистонда давлат шифохоналаридаги барча беморлар COVID-19 учун тестдан ўтказилмоқда, шу пайтгача коронавируснинг бу номаълум иситма билан бирорта боғлиқлиги аниқланмаган.
Кейинроқ штат котибининг соғлиқни сақлаш масалалари бўйича ўринбосари Амит Мохан ушбу номаълум касаллик денге безгаги бўлиши мумкинлигини маълум қилди.
«Касалликнинг келиб чиқиш сабаблари ҳалигача ўрганилмоқда, аммо симптомлари денге безгагига ўхшайди. Биз давлат соғлиқни сақлаш тизимининг барча имкониятларини ишга туширдик», — деди у.
2020 йилнинг декабрида Ҳиндистонда 300 дан ортиқ киши номаълум касаллик билан шифохонага ётқизилган эди. Бир киши вафот этган. Кейинчалик ушбу номаълум касалликка металлардан заҳарланиш сабаб бўлгани тахмин қилинди.
Изоҳ (0)