Qashqadaryo viloyati Kitob tumanida voyaga yetmagan bolaga noqonuniy diniy ta’lim berish bilan shug‘ullanib kelgan ona-bola aniqlandi. Bu haqda tuman hokimligi axborot xizmatiga tayanib, NasafNews xabar berdi.
Ma’lum qilinishicha, “Denov” mahallasida yashovchi fuqaro F.K. o‘zining yashash uyida Qarshi shahrida istiqomat qiluvchi ikki nafar voyaga yetmagan bolaga hamda uning 19 yoshli qizi M.S. maktab yoshidagi 11 nafar o‘quvchi qizlarga yashash va o‘qishi uchun belgilangan talablarga javob bermaydigan joyda, hujra sharoitida diniy ta’lim berib kelgan.
Ma’lumotlarga ko‘ra, o‘rganishlar davomida fuqaro F.K. va uning qizi M.S. hech qanday rasmiy diniy ma’lumotga ega emas.
Hozirda huquqni muhofaza qiluvchi organlar tomonidan voyaga yetmagan o‘quvchilarga ruhiy yoki jismoniy tazyiq o‘tkazilgani yoki o‘tkazilmagani, taqiqlangan g‘oyalarni singdirilgani yoki singdirilmaganlik holatlari tekshirilmoqda.
Avvalroq Toshkent viloyatida 25 nafar bolaga noqonuniy diniy saboq berib, ularni kaltaklagan aka-ukalar ushlangani, Samarqand viloyati IIB masjidlarning birida voyaga yetmagan bola so‘roq qilingani tasvirlangan videoga izoh bergani, Gulistonda maktab o‘quvchilariga noqonuniy diniy ta’limdan dars berib kelgan ayollar aniqlangani haqida xabar berilgandi.
Izoh (0)