Sog‘liqni saqlash vazirligi ijtimoiy tarmoqlarda “Namanganda vaksina olgan ayol gapirmaydigan, o‘rnidan turolmaydigan bo‘lib qoldi” mazmunida tarqalgan xabarlarga munosabat bildirdi.
Ijtimoiy tarmoqlarda Namangan shahar “Baraka” mahallasida yashovchi ayol vaksina olganidan so‘ng, falaj holatga tushib qolgani aytilgan video tarqaldi.
Vazirlikning ma’lum qilinishicha, Namangan shahrida yashovchi ayol Z.A. bilan bog‘liq holat shu vaqtning o‘zidayoq Sog‘liqni saqlash vazirligi nazoratiga olingan. Tezkor ishchi guruh tuzilgan, vaziyat bevosita o‘rganilmoqda.
Dastlabki o‘rganishlarga ko‘ra, 1968-yilda tug‘ilgan fuqaro Z.A. koronavirusga qarshi vaksinaning faqatgina bitta dozasini bundan ikki oy oldin, ya’ni 28-iyun kuni olgani ma’lum bo‘lgan. Shu ma’lumotning o‘ziyoq fuqaroning sog‘lig‘idagi o‘zgarish emlash jarayonlariga mutlaqo bog‘liq emasligini aniq ko‘rsatadi.
Ayni damda fuqaro Z.A.ning holati to‘liq tibbiy nazoratga olingan. Vaziyat yuzasidan o‘rganishlar yakunlangach, qo‘shimcha ma’lumot beriladi.
“Shu o‘rinda Sog‘liqni saqlash vazirligi bu kabi provokatsion va feyk xabarlar tarqatib, aholi orasida vaksinatsiya jarayonlariga ishonchsizlik paydo qilishga urinishdan tiyilishni so‘rab qoladi”, — deyiladi xabarda.
Avvalroq ijtimoiy tarmoqlarda Xorazm viloyatida vaksina olgandan so‘ng ahvoli og‘irlashgan fuqaro haqida videolavha tarqalgach, Sog‘liqni saqlash vazirligi ushbu vaziyatni nazoratga olgani, uning ahvolini o‘rganish, bu holat nima sababdan yuz berganiga aniqlik kiritish maqsadida tezkor mutaxassislar guruhi tuzilgani haqida xabar berilgan edi. Keyinroq SSV xorazmlik ayolning salomatligidagi o‘zgarishlar koronavirusga qarshi emlash bilan bog‘liq emasligini ma’lum qildi.
Izoh (0)