«Бу ҳалол инсоннинг бутун умри меҳнатда ўтди» – Шавкат Мирзиёев адабиётшунос олим Иброҳим Ғафуров ҳақида

Президент Шавкат Мирзиёевнинг қатор фармонларига мувофиқ, Ўзбекистон Мустақиллигининг 30 йиллиги муносабати билан бир гуруҳ ўзбекистонликлар фахрий унвонлар, орден ва медаллар билан тақдирланган эди.

Бугун, 30 август куни Кўксаройда ушбу мукофотларни топшириш маросими бўлиб ўтмоқда.

«Дарё» мухбири Миролим Исожоновнинг хабар беришича, давлат раҳбари «Ўзбекистон Қаҳрамони» унвони билан тақдирланган адабиётшунос олим Иброҳим Ғафуров ҳақида фикр билдирган.

«Ўзбек адабиётининг забардаст намоёндаси, атоқли таржимон Иброҳим ака Ғафуров тимсолида адабиётимизнинг пок, ҳалол, камтарин катта вакилини кўраман. Бу инсон бутун умр меҳнат қилди, умри шукроналикда ўтди.

Ҳозирги кунда ҳам кўплаб шоир ва ёзувчилар, таржимонлар Иброҳим акани адабиёт соҳасидаги устозим дейди, унга муносиб шогирд бўлишга ҳаракат қилади.

Мен Эркин ака Воҳидов ва Абдулла ака Ориповлар билан дўст эдим. Биз Эркин Воҳидов билан кечалари кўп масалалар ҳақида гаплашардик. У киши "Агар ўзбек тилининг бойлигини, чиройини билишни хоҳласангиз, Иброҳим акага мурожаат қилиш керак", деб айтарди. Абдулла ака билан Зомин мактабини биргаликда ташкил қилганмиз.

Иброҳим аканинг кўп йиллик меҳнатларини қадрлаб, уларни «Ўзбекистон Қаҳрамони» унвонига муносиблиги учун фармонга имзо қўйдим. Ўйлайманки, Иброҳим ака сингари меҳнаткаш ижодкорлар сафи янада кенгаяди», деди Президент.

Маълумот учун, «Ўзбекистон Қаҳрамони» олий даражадаги унвон бўлиб, 1994 йилда таъсис этилган. Ўзбекистон фуқароларига давлат ва халқ олдидаги қаҳрамонона жасорат кўрсатиш билан боғлиқ хизматлари учун Ўзбекистон Президенти томонидан берилади. Унвон айрим ҳолларда Ўзбекистон фуқароси бўлмаган шахсларга ҳам берилиши мумкин.

Ушбу унвон билан тақдирланган шахсга олий нишон — «Олтин юлдуз» медали ва унвон берилганлиги тўғрисидаги ҳужжат топширилади. Ушбу медал 750 даражали (пробали) олтин қотишмасидан тайёрланади ва олд томонида ҳар бир қиррасининг икки ёнбағридан олтин нурлар таралган саккиз қиррали юлдуз шаклида бўлади.

«Ўзбекистон Қаҳрамони» унвони билан тақдирланган шахслар ойлик иш ҳақига ёки пенсияга қўшимча равишда энг кам ойлик иш ҳақи миқдорида ой сайин тўланадиган устама мукофот олади, қонун ҳужжатларида белгилаб қўйилган имтиёзлардан фойдаланади.