Qashqadaryo viloyatining Chiroqchi tumanida prokuror qabuliga borgan odamlar “O‘zbekistonda qonun yo‘q, hech qachon bo‘lmaydi”, deya norozilik bildirib, g‘alayon ko‘targani aks etgan video 28-avgust kuni ijtimoiy tarmoqlarda tarqaldi. Bosh prokuratura matbuot xizmati videoyozuvdagi holat yuzasidan rasmiy ma’lumot berdi.
Aniqlanishicha, 25-avgust kuni Chiroqchi tumani “Tarag‘ay” mahallasida yashovchi fuqaro A.B. mast holatda o‘g‘li bilan janjallashib, o‘g‘liga og‘ir tan jarohati yetkazib, o‘limiga sababchi bo‘lgani yuzasidan Jinoyat kodeksining 104-moddasi 3-qismi “d” bandi bilan jinoyat ishi qo‘zg‘atilib, tergov harakatlari tuman Ichki ishlar boshqarmasi tergovchilari ish yurituviga olingan.
Jinoyatning kelib chiqishiga imkon bergan shart-sharoitlarni aniqlash va kelgusida shu kabi jinoyatlar sodir etilishining oldini olish maqsadida 27-avgust kuni soat 18:00 larda tumanning 4-sektor hududida joylashgan “Tarag‘ay” mahallasidagi 27-sonli maktab binosida “Tarag‘ay” va unga qo‘shni bo‘lgan “Langar” mahallalari faollari ishtirokida tuman va viloyat Ichki ishlar boshqarmasi mas’ullari tomonidan muhokama yig‘ilishi belgilangan.
Mazkur yig‘ilish ichki ishlar organlari tomonidan tashkil etilib, yig‘ilishda prokuratura vakillarining ishtiroki nazarda tutilmagan.
Ma’lumot uchun, 25-iyun kuni “Langar” MFY To‘laqul qishlog‘ida fuqaro J.A. qo‘shnisi — homilador N.J.ga nisbatan kuch ishlatib, uni jinsiy aloqa qilishga undaydi. Biroq yuzaga kelgan holatda o‘z nomusini himoya qilgan ayol yonida bo‘lgan oshxona pichog‘i bilan J.A.ga bir marotaba zarba urib, uni o‘ldiradi.
Ushbu holat yuzasidan jinoyat ishi qo‘zg‘atilib, Chiroqchi tuman prokuraturasi tomonidan tergov harakatlari olib borilmoqda.
Tergov harakatlari davomida marhum J.A.ning o‘limi holati yuzasidan Chiroqchi tuman prokurori tomonidan Langar qishlog‘ida aholi va jabrlanuvchilar bilan ikki marotaba uchrashuv o‘tkazilgan, marhumning yaqinlari tuman prokuraturasida uch marotaba qabul qilinib, ularning jinoyatga N.J.ning akasi va otasining ham aloqasi borligi haqidagi tahminlari dastlabki tergovda tekshirilib, o‘z tasdig‘ini topmagan.
Marhum J.A.ning o‘limi holati yuzasidan tergov harakatlari ustidan viloyat prokuraturasi tomonidan nazorat o‘rnatilgan.
Shunga qaramasdan, 27-avgust kuni Ichki ishlar boshqarmasi mas’ullari tomonidan “Tarag‘ay” mahallasida umuman boshqa jinoyat ishi muhokamasiga bag‘ishlangan yig‘ilishga marhum J.A.ning qarindoshlari o‘zboshimchalik bilan kelib, jamoat tartibini buzib, huquqni muhofaza qiluvchi organ xodimlariga nisbatan tuhmat va haqoratamuz iboralarni ishlatib, prokuror qabul qilishini talab qilib, “viloyat prokuraturasi majlisga kelaman deb kelmadi”, degan asossiz vajlar bilan, videolavhalarni internet tarmoqlarida tarqatib yuborgan.
Xabarda ta’kidlanishicha, videolavha orqali huquqni muhofaza etuvchi organlarni obro‘sizlantirishga qaratilgan harakatlarga qonuniy baho berilishi ta’minlanadi.
Qashqadaryo viloyati IIB xabarida qayd etilishicha, marhum A.J.ning o‘limi yuzasidan J.N.ga nisbatan Jinoyat kodeksining 97-moddasi (qasddan odam o‘ldirish) bo‘yicha jinoyat ishi qo‘zg‘atilib, hozirda Chiroqchi tuman prokuraturasi tomonidan tergov harakatlari olib borilmoqda. Jinoyat ishining tergovi viloyat prokurori tomonidan nazoratga olingan.
Izoh (0)