FIFA qaroriga ko‘ra “Navbahor” 30 kun ichida Andrey Kanchelskisga 1,6 million dollar to‘lashi kerak. Namangan klubi esa qaror hali qonuniy kuchga kirmaganini aytmoqda

FIFA murabbiy Andrey Kanchelskis va “Navbahor” o‘rtasidagi ishni rossiyalik murabbiy foydasiga hal qildi, deb xabar bermoqda “Match TV”.

Ta’kidlanishicha, qabul qilingan da’volar foizlar bilan birga 1,6 million dollardan oshgan. “Navbahor” ushbu summani 30 kun ichida to‘lab berishi kerak bo‘ladi.

Kanchelskis “Navbahor” bilan maoshlarini vaqtida olmagani uchun shartnomani bekor qilgandi. Shundan so‘ng u shartnoma bekor qilingani uchun kompensatsiya olish uchun FIFAga ariza yozgani haqida xabar berilgandi.

“Navbahor” matbuot xizmati holat yuzasidan rasmiy bayonot berdi. Quyida ushbu bayonot to‘liqligicha taqdim etiladi.

“Navbahor” PFK FIFAning Futbolchilar maqomi bo‘yicha qo‘mitasi tomonidan 2021-yil 25-avgust kungi “Navbahor” klubi va Andrey Kanchelskis ishi yuzasidan qabul qilingan FPSD-256-sonli qarori bo‘yicha quyidagilarni bildiradi:

• FIFAning Futbolchilar maqomi bo‘yicha qo‘mitasi tomonidan 2021-yil 25-avgust kungi “Navbahor” klubi va Andrey Kanchelskis ishi bo‘yicha qabul qilgan FPSD-256-sonli qarori hali qonuniy kuchga kirmagan.
• “Navbahor” PFK ushbu qaror qaysi asoslarga ko‘ra qabul qilingani bo‘yicha xabardor qilinmagani sababli, tegishli tartibda e’tiroz (shikoyat) yo‘llaydi.
• “Navbahor” PFK FIFA qabul qilgan mazkur qarorning asoslovchi (“motivirovochniy”) qismini hali olmagan, qarorning nima sababdan bunday ko‘rinish olganidan bexabar. Qachonki, mazkur qaror yuzasidan asoslovchi sabablar ko‘rsatilib, jarayondan to‘liq xabardor bo‘lganimizdan keyin ushbu qarorga e’tiroz bildiriladi.

P.S.: futbol jamoatchiligi, xususan, mamlakatimizdagi sportga ixtisoslashgan nashrlardan bunday pallada shoshilinch xulosa chiqarmaslikni, mazkur vaziyatda har ikki tomon manfaatlarini nazarda tutgan holda, rasmiy hujjatlar qonuniy kuchga kirgandan keyin shunga ko‘ra munosabat bildirishni so‘rab qolamiz. Chunki har qanday yanglish xulosa ta’sirida qilinadigan turli (jumladan, provokatsion xarakterga ega) chiqishlar (xabar, maqola, so‘rov) futbol jamoatchiligida noto‘g‘ri fikr shakllanishiga olib kelishi mumkinligini inobatga olish darkor.

“Navbahor” bayonoti