Mashhur “stoyka”, Chempionlar Ligasidagi sakrash va ilk “Oltin to‘p”. Krishtianu Ronalduning “Manchester Yunayted”dagi eng esda qolarli damlari
Krishtianu Ronalduning “Manchester Yunayted”ga qaytishi, albatta, “Yunayted” muxlislari va Premyer Liga ixlosmandlarida iliq xotiralarni uyg‘otdi. Portugaliyalik Angliyaga yosh iste’dod sifatida kelib, qisqa vaqt ichida jahon yulduziga aylangandi.
“Manchester Yunayted” bilan birgalikda Ronaldu uch marta Premyer Ligada g‘olib chiqqan. Chempionlar Ligasi, Angliya Kubogi, Angliya Superkubogi va klublar o‘rtasidagi Jahon Chempionatida esa bir martadan zafar quchgan. Shuningdek, Liga Kubogida ikki bor bosh sovrinni qo‘lga kiritgan. Krishtianu jamoaviy g‘alabalarini shaxsiy yutuqlari bilan parallel ravishda olib borgan. U 2008-yilda dastlabki “Oltin to‘p”ini qo‘lga kiritdi va 196 ta o‘yinda 84 ta gol uradi.
Hozir uning bu statistikasi hayratomuz bo‘lib ko‘rinmaydi, (ayniqsa, Krishning keyingi yillardagi samaradorligi fonida), biroq hamma yaxshi eslaydiki, o‘shanda Ronaldu yakka yakunlovchi maqomidan ancha uzoq bo‘lgan – u vaziyatlar yaratar, himoyachilarni aldab o‘tar va nostandart qarorlar bilan muxlislarni lol qoldirardi.
Quyida Krishtianu Ronalduning “Manchester Yunayted”dagi eng esda qolarli damlari aks etgan suratlar bir sahifaga jamlandi.
Ronaldu va “Manchester Yunayted” haqida gap ketganda, Ser Aleks Fergyusonni esga olmaslikning iloji yo‘q. Hammasi shu tariqa boshlangandi. Foto: Getty Images
Krishtianu Rud van Nistelroy bilan “Yunayted”dagi ilk sovrinini nishonlamoqda. 2003/04-yilgi mavsumda Angliya Kubogi finalida “Milluoll” mag‘lub etilgandi (3:0). Krishtianu hisobni ochgan bo‘lsa, van Nistelroy dubl qayd etgan. Getty Images
Jamoaning hozirgi murabbiyi Ronaldu bilan 2003–2007-yillarda birga o‘ynagan. Ole-Gunnar Sulsher Krish haqida doim iliq fikrlar bildirgan – transferdan bir necha soat oldin esa u portugaliyalikni barcha davrlarning eng yaxshi futbolchisi deb atadi. Foto: Getty Images
Bu esa Ronalduning mashhur tayyorgarlik jarayonining (“stoyka”) tug‘ilishi. Foto: Getty Images
2008-yil yanvar oyida Ronaldu “Manchester Yunayted” tarkibidagi yagona het-trikini qayd etgan – “Nyukasl”ga qarshi o‘yin (6:0). O‘shanda Shey Given Krishning zarbalaridan aziyat chekkandi. Foto: Getty Images
2008-yilgi Chempionlar Ligasi finali. Ronaldu o‘zining ajoyib sakrashi orqali hisobni ochadi. Foto: Twitter
Krishtianu Ronalduning Chempionlar Ligasidagi ilk sovrini. Shundan so‘ng u yana 4 marta ushbu sovrinni boshi uzra baland ko‘taradi, ammo hamma narsaning birinchisi boshqacha bo‘ladi. Foto: Twitter
Ronaldu ushbu g‘alabani Fergyuson bilan birga nishonlashni ham unutmagan. Foto: Getty Images
Foto: Twitter
Xuddi shu ssenariy “Oltin to‘p” bilan ham sodir bo‘lgan. Hozirda portugaliyalikning hisobida 5 shunday to‘p mavjud. Birinchisini aynan 2008-yili “Yunayted”da qo‘lga kiritgan. Sovrinni afsonaviy Denis Lou va Bobbi Charlton bilan birga nishonlamoqda. Foto: Getty Images
Albatta, 2007/08-yilgi mavsum “Oltin butsa”dan ham xoli bo‘lmagan. O‘shanda Ronaldu 31 ta gol urgandi. Foto: “Manchester Yunayted”
2009-yil. Ronaldu APLdagi (hozircha) oxirgi chempionligini onasi bilan nishonlamoqda. Foto: “Manchester Yunayted”
Chempionlikdan bir yarim oy o‘tgach, Ronaldu “Real”ga yo‘l oladi. Uning taqdimotiga “Santyago Bernabeu”ga 80 ming muxlis keladi. Foto: Getty Images
“Manchester Yunayted” 2013-yildan buyon APLda g‘alaba qozonmagan. Ammo endi Ronaldu qaytdi, u kabi o‘yinchi bilan jamoa oldiga faqat eng yuqori natijalar qo‘yiladi.
Izoh (0)