24-avgust kuni O‘zbekiston tashqi ishlar vaziri Abdulaziz Komilov Germaniyaning favqulodda va muxtor elchisi etib tayinlangan Tilo Klinnerni qabul qildi. Bu haqda TIV matbuot xizmati xabar berdi.
Ishonch yorliqlarining nusxalarini qabul qilgan Komilov elchini mas’ul lavozimga tayinlangani bilan tabrikladi hamda uning serqirra O‘zbekiston—Germaniya hamkorligini yanada rivojlantirish va mustahkamlash yo‘lida ishlashiga umid bildirdi.
Qayd etilganidek, zamonaviy bosqichda O‘zbekiston va Germaniya munosabatlari, oliy darajadagi muntazam va o‘zaro ishonchga asoslangan muloqot samarasi o‘laroq, ko‘plab sohalarda jadal rivojlanmoqda. Har ikki tomonning siyosiy-diplomatik, savdo-iqtisodiy, madaniy-gumanitar, ilm-fan va ta’lim sohalaridagi konstruktiv aloqalarni kengaytirishdan birday manfaatdorligi e’tirof etilgan.
Turli darajalardagi bo‘lajak tadbirlar jadvali ham muhokama qilingan.
“Germaniya tomoni O‘zbekistonga Afg‘onistondan chet el fuqarolari va diplomatlarni evakuatsiya qilishda ko‘rsatgan yordami uchun minnatdorlik bildirdi”, — deyiladi xabarda.
Avvalroq Konstantin Obolenskiy Shveysariyaning O‘zbekistondagi elchisi etib tayinlangani, Abdulaziz Komilov Saudiya Arabistoni tashqi ishlar davlat vaziri bilan Afg‘onistondagi voqealarni muhokama qilgani to‘g‘risida xabar berilgandi.
Izoh (0)