Олий суд раиси ўринбосари Икром Муслимов раислигида 2021 йил 25 август куни ўтказилган очиқ суд мажлисларида мустабид совет тузуми даврида қатағон қурбони бўлган ва ҳозирги кунга қадар оқланмаган юзлаб шахслар оқланди. Бу ҳақда «Дарё» мухбири хабар бермоқда.
Таъкидланишича, Ўзбекистон Президентининг 2020 йил 8 октябрдаги «Қатағон қурбонларининг меросини янада чуқур ўрганиш ва улар хотирасини абадийлаштиришга доир қўшимча чора-тадбирлар тўғрисида»ги фармойишига биноан, республика ишчи гуруҳи тузилган ва қатағон қурбонларининг номларини тиклаш ҳамда хотирасини абадийлаштириш бўйича «йўл харитаси» тасдиқланган.
Қатағон қурбонлари хотираси давлат музейи директори, республика ишчи гуруҳи аъзоси Б.Ҳасанов томонидан қатағон қурбони бўлган ва ҳозиргача оқланмаган шахсларнинг рўйхати тақдим этилган.
Мазкур шахсларнинг етти нафарига нисбатан жиноят ишлари ДХХнинг архивида сақланаётганлиги аниқланиб, жиноят ишлари чақиртирилган.
Олий судга 2021 йилнинг 24 февралида 115 нафар шахсга нисбатан 6 та жиноят иши келиб тушган бўлиб, ишчи гуруҳ томонидан ўрганиб чиқилган. Ушбу жиноят ишларида суд мажлиси баённомаси ёки суд ҳужжатлари (ҳукм ёки бошқача қарор) мавжуд эмаслиги, ишларда фақатгина ОГПУнинг учлик мажлиси баённомасидан кўчирма борлиги аниқланган.
Бош прокурор ўринбосари томонидан ушбу жиноят ишлари юзасидан тегишли тартибда Олий суднинг Жиноят ишлари бўйича судлов ҳайъатига протестлар келтирилган.
Мазкур жиноят ишлари Олий суд раиси ўринбосари Икром Муслимов раислигида ўтказилган очиқ суд мажлисларида кўриб чиқилиб, келтирилган протестлар қаноатлантирилди ва ЖПКнинг 83-моддасига асосан жами 6 та жиноят иши бўйича 115 нафар шахс оқланди.
Улар орасида Акмал Икромов, Рустам Исломов, Акбар Исломов, Сулаймон Азимов, Муҳаммаджон Йўлдошев, К.Болтаев, М.Ҳасанов, Манжара ва бошқаларнинг номи қайд этилган.
Изоҳ (0)