Buyuk Britaniya qirolichasi Yelizaveta II Bukingem saroyi amaldorlariga shahzoda Garri va uning rafiqasi Megan Marklning tanqidlari yuzasidan tuhmat ishlari bo‘yicha mutaxassislar bilan maslahatlashishni buyurdi. Bu haqda The Sun manbasiga tayanib xabar berdi.
Nashr suhbatdoshining so‘zlariga ko‘ra, 95 yoshli qirolicha “doimiy hujumlardan bezovtalanadi”. “Hamma narsaning chegarasi bor. Qirolicha va uning oilasi advokatlarni yolladi. Garri va Megan takroriy hujumlar qabul qilinishi mumkin emasligini bilib va tushunib oladi”, — dedi manba. U advokatlar Sasseks gersogi va gersoginyasining bayonotlariga “qonuniy javob” tayyorlayotganini ta’kidladi.
The Sun yozishicha, xususan, advokatlar 2022-yil oxirida shahzoda Garrining xotiralarini nashr etishga tayyorlanayotgan Penguin Random House nashriyotiga ogohlantirish yuborishni o‘ylamoqda.
“Men hayotim davomida o‘rganganlarimni bo‘lishish imkoniyatidan juda minnatdorman va odamlar mening mutlaqo haqiqatga asoslangan hikoyamni birinchilardan bo‘lib o‘qishidan juda hayajondaman”, — degan edi kitob muallifi avvalroq.
“Agar kitobda kimdir tilga olinsa va biror nimada to‘g‘ridan to‘g‘ri ayblansa, bu tuhmat va shaxsiy oilaviy hayotga nisbatan huquqlarning buzilishi deb baholanishi mumkin”, — dedi The Sun manbasi. U advokatlar kitob mazmuni bilan tanishish va izoh berish imkoniyatiga ega bo‘lish uchun nashriyot bilan bog‘lanishini istisno qilmadi.
Bukingem saroyi bu haqda izoh berishdan bosh tortdi.
Mart oyida Britaniya shahzodasi Garri va uning rafiqasi Megan Markl amerikalik mashhur teleboshlovchi Opra Uinfriga intervyu bergandi. Intervyuda boshqa masalalar qatorida, Megan qirollik oilasining ba’zi a’zolari juftlikning birinchi fazandi Archining tanasi qoramag‘iz bo‘lishidan xavotirlangani haqida aytgan. Shahzoda Garri va Megan Marklning intervyusi shov-shuvga aylandi. Butun dunyo Britaniya monarxiyasi bu zarbaga qanday dosh berishini muhokama qildi.
31-avgustda britaniyalik jurnalistlar Omida Skobi va Kerolin Dyurand muallifligidagi Sasseks gersogi va gersoginyasining turmushi haqida yozilgan Finding Freedom (“Erkinlikni topish”) kitobini qayta nashr etish rejalashtirilgan (kitobning birinchi versiyasi 2020-yil avgustda nashr etilgan). Yangilangan versiyaga qo‘shilgan epilogda mualliflar shahzoda Garri va Megan Markl Uinfri bilan bo‘lgan intervyuda aytilgan gaplarga, xususan, irqchilik haqidagi bayonotga qirollik oilasi bildirgan munosabatdan hafsalasi pir bo‘lganini ta’kidlaydi, deb yozadi The Times. “Oradan vaqt o‘tib, endi hech kim javobgarlikni o‘z zimmasiga olishga tayyor emas. Buni hisobga olib, qanday qilib davom etish mumkin?” — dedi Sasseks gersoginyasining do‘stlaridan biri nashrga. Avvalroq er-xotinning matbuot kotibi shahzoda Garri va Megan Marklning kitobga hech qanday aloqasi yo‘qligini aytgan.
Izoh (0)