Rossiya prezidenti Vladimir Putin Grozniy xalqaro aeroportiga Checheniston birinchi prezidenti Ahmad Qodirov nomini berdi. Tegishli farmon huquqiy axborot rasmiy portalida e’lon qilingan, deb yozadi Meduza.
“Grozniy (Shimoliy) xalqaro aeroportiga A.A.Qodirovning nomi berilsin”, — deyiladi farmonda.
Xabarga ko‘ra, farmon Ahmad Qodirov tavalludining 70 yilligi munosabati bilan imzolangan. 2021-yilning bahorida Chechenistonda Grozniy aeroportiga kimning nomini berish kerakligi ovozga qo‘yilgan. Ovoz berish Checheniston jamoatchilik palatasi tomonidan tashkil qilingan. Ma’lum bo‘lishicha, qariyb 90 foiz ishtirokchilar Ahmad Qodirov nomiga ovoz bergan.
Ahmad-Hoji Qodirov — Chechenistonning amaldagi prezidenti Ramzan Qodirovning otasi. U 2000-yildan Checheniston muvaqqat ma’muriyatining rahbari, 2003-yildan respublika prezidenti bo‘lib ishlagan. Ahmad Qodirov 2004-yil 9-mayda Grozniydagi “Dinamo” stadionida sodir bo‘lgan portlashda halok bo‘lgan. Vafotidan keyin unga “Rossiya Qahramoni” unvoni berildi.
Chechenistonning ko‘plab shaharlarida 300 dan ortiq ko‘chalar, maktablar va bolalar bog‘chalari Ahmad Qodirov nomi bilan ataladi. Birinchi prezident sharafiga uning ajdodlari yashagan qishloq nomi o‘zgartirilgan. Grozniyda bosh maydon, xiyobon, masjid, istirohat bog‘i va boshqa obyektlarga Ahmat Qodirov nomi berilgan. Shuningdek, uning ismi Rossiya gvardiyasining chechen polki va ilgari “Terek” deb atalgan “Ahmad” futbol klubiga berilgan.
Izoh (0)