O‘zbekistonda 2019-yildan beri 50 ta bog‘chaning ta’mirlash ishlariga ajratilgan budjet mablag‘lari talon-toroj qilingani aniqlandi

Oliy Majlis Senatida 21-avgust kuni Tanzila Norboyeva boshchiligida korrupsiyaga qarshi kurashish kengashining navbatdagi majlisi bo‘lib o‘tdi. Bu haqda Senat axborot xizmati xabar berdi.

Yig‘ilishda korrupsiyaga qarshi murosasiz munosabatda bo‘lish muhitini yaratish, davlat va jamiyat boshqaruvida korrupsiyaviy omillarni keskin kamaytirish hamda korrupsiyaga qarshi kurashish faoliyatini samarali tashkil etishga oid O‘zbekiston Prezidentining 2 ta hujjati – farmon va qarori, shuningdek, Korrupsiyaga qarshi kurashish bo‘yicha 2021–2022-yillarga mo‘ljallangan davlat dasturi qabul qilindi.

Majlisda vazirlik va idoralar birinchi rahbarlarining ijro intizomi bo‘yicha shaxsiy mas’uliyatini oshirish, Milliy kengash majlisi bayonnomasida belgilangan vazifalarni to‘liq ado etishlari yuzasidan aniq topshiriqlar berildi.

Bundan tashqari, maktabgacha ta’lim, xalq ta’limi, madaniyat, sog‘liqni saqlash, bandlik, transport sohalari hamda mahalliy ijroiya hokimiyati organlari tizimida sodir etilgan korrupsiyaviy jinoyatlar va ularning kelib chiqish sabablari tahlil etildi.

Ta’kidlanishicha, 2021-yilning birinchi yarim yilligida maktabgacha ta’lim tizimining qurilish sohasida 89 ta holatda moliyaviy xato va kamchiliklar aniqlangan. 2019–2020-yillar va 2021-yilning birinchi yarmida 50 ta MTTda amalga oshirilgan kapital ta’mirlash ishlarida budjet mablag‘lari talon-toroj qilingan.

Oliy ta’lim tizimida o‘tkazilgan o‘rganishda 2 ta oliygohda buxgalteriya xizmatining xodimlari tomonidan mablag‘lar noqonuniy o‘zlashtirilgani aniqlangan.

Majlisda moliyaviy intizomni kuchaytirish va budjet daromadlarini oshirishga qaratilgan muhim vazifalar belgilab olindi.

Bundan avval Sergelida 32,5 ming dollarni o‘zlashtirib yuborgan bank kassiri va bosh mutaxassisiga jinoyat ishi qo‘zg‘atilgani, Farg‘onada ombor mudiri aholi va davlat tashkilotlariga tarqatilishi kerak bo‘lgan 852 ming tonna ko‘mirni sotib yuborgani aniqlangani hamda Samarqanddagi davlat muassasalarida 563 million so‘m budjet mablag‘lari talon-toroj qilingani aniqlangani haqida xabar berilgandi.