Toshkentda 27 yoshli yigit imkoniyati cheklangan qizni kaltakladi. Holat bo‘yicha ma’lumot berildi

Toshkent shahrida 27 yoshli yigit kar-soqov qizni kaltakladi. Shahar Ichki ishlar bosh boshqarmasi holat yuzasidan ma’lumot berdi.

Qayd etilishicha, video Toshkent shahar IIBB xodimlari tomonidan o‘rganilgan. Janjallashgan fuqarolarning shaxslari aniqlangan.

Ma’lum bo‘lishicha, 20-avgust kuni soat 08:00 da Chilonzor tumani “Sharq” mahallasi hududida 22 yoshli M.M. va 27 yoshli U.K. o‘rtasida pul sababli janjal kelib chiqqan. Badan shikastlari og‘irligi darajasini aniqlash maqsadida sud-tibbiy ekspertizasi tayinlangan.

Tergov oldi tekshiruvi natijalariga ko‘ra zarur choralar ko‘rilishi ma’lum qilingan.

Bundan avval Samarqandda go‘zallik salonida ishlaydigan ayolni mast erkak ayovsiz kaltaklagani, Namanganda shifokorni kaltaklagan aka-uka ehtiyot chorasi sifatida qamoqqa olingani hamda Toshkentda imkoniyati cheklangan qizni kaltaklagan ayol qilmishidan pushaymonligini aytib, uzr so‘ragani haqida xabar berilgandi.