YouTube’dagi taniqli Woodworking Art kanalining egasi — vyetnamlik duradgor Chiong Van Dao oddiy yog‘och bo‘laklaridan Ferrari 250 GTO nusxasini yaratish jarayoni tasvirlangan video bilan bo‘lishdi. Mashinani yasash uchun usta 70 kun vaqt sarflagan. Loyiha yakunlanishi bilan erkak o‘g‘li bilan birga qo‘lbola sportkarda Vyetnam ko‘chalari bo‘ylab harakatlangan, deb xabar beradi Motor.
Kadr: YouTube
Duradgor 70 kunlik mashaqqatli mehnatini 14 daqiqalik videorolikka joylashtirgan. Usta sportkar nusxasini yasash uchun oddiy yog‘och bo‘laklaridan foydalangan bo‘lib, benzoarra yordamida u avtomobilning umumiy ko‘rinishini qirqib olgan. Shundan so‘ng mutaxassislar asbob-anjomlari yordamida uning tomini, orqani ko‘rishga mo‘ljallangan ko‘zgusini, shuningdek, kuzovning boshqa elementlarini yasagan. Yog‘och asosga duradgor trubali metall shassini o‘rnatgan.
Mashina tashqi ko‘rinishi ustidagi ishlarni yakunlagan Chiong Van Daol uning interyerini tayyorlashga kirishgan. Shunday qilib sportkar salonida qurilmalar paneli, kovshsimon o‘rindiq paydo bo‘lgan. Mutaxassis o‘z loyihasini burilish chiroqlariga ega optika, kichik g‘ildiraklar, shuningdek, avtomobil raqamlari va Ferrari emblemasi bilan bezagan.
Loyiha yakunda usta yog‘och avtomobilga kartingning elektromotorini va akkumulyator batareyalarini o‘rnatgan. Bloger uning quvvati, shu bilan birga, bir marta quvvatlanish orqali bosib o‘tadigan yo‘lini oshkor etmagan.
Avvalroq vyetnamlik usta yog‘och bo‘lagidan Mercedes-AMG G 63 ning aniq nusxasini yaratgani, shuningdek, 1:13 masshtabda yog‘ochdan yaratilgan o‘zining so‘nggi ishi — Ford Ranger Raptor modelini sotuvga qo‘ygani to‘g‘risida xabar berilgandi.
