YouTube’даги таниқли Woodworking Art каналининг эгаси — вьетнамлик дурадгор Чионг Ван Дао оддий ёғоч бўлакларидан Ferrari 250 GТО нусхасини яратиш жараёни тасвирланган видео билан бўлишди. Машинани ясаш учун уста 70 кун вақт сарфлаган. Лойиҳа якунланиши билан эркак ўғли билан бирга қўлбола спорткарда Вьетнам кўчалари бўйлаб ҳаракатланган, деб хабар беради Motor.
Дурадгор 70 кунлик машаққатли меҳнатини 14 дақиқалик видеороликка жойлаштирган. Уста спорткар нусхасини ясаш учун оддий ёғоч бўлакларидан фойдаланган бўлиб, бензоарра ёрдамида у автомобилнинг умумий кўринишини қирқиб олган. Шундан сўнг мутахассислар асбоб-анжомлари ёрдамида унинг томини, орқани кўришга мўлжалланган кўзгусини, шунингдек, кузовнинг бошқа элементларини ясаган. Ёғоч асосга дурадгор трубали металл шассини ўрнатган.
Машина ташқи кўриниши устидаги ишларни якунлаган Чионг Ван Даол унинг интерьерини тайёрлашга киришган. Шундай қилиб, спорткар салонида қурилмалар панели, ковшсимон ўриндиқ пайдо бўлган. Мутахассис ўз лойиҳасини бурилиш чироқларига эга оптика, кичик ғилдираклар, шунингдек, автомобиль рақамлари ва Ferrari эмблемаси билан безаган.
Лойиҳа якунда уста ёғоч автомобилга картингнинг электромоторини ва аккумулятор батареяларини ўрнатган. Блогер унинг қуввати, шу билан бирга, бир марта қувватланиш орқали босиб ўтадиган йўлини ошкор этмаган.
Аввалроқ вьетнамлик уста ёғоч бўлагидан Mercedes-АМG G 63 нинг аниқ нусхасини яратгани, шунингдек, 1:13 масштабда ёғочдан яратилган ўзининг сўнгги иши — Ford Ranger Raptor моделини сотувга қўйгани тўғрисида хабар берилганди.
Изоҳ (0)