Qashqadaryoda ikki shaxs ichki ishlar xodimlariga pichoq bilan hujum qildi

Qashqadaryoda ikki shaxs restoranda janjal qilib, ichki ishlar xodimlariga hujum qildi, deya xabar qilmoqda viloyati IIB axborot xizmati.

Qarshi shahar “Temiryo‘lchi” MFYda yashovchi fuqaro N.L. 2021-yil 19-fevral kuni soat 00:05 larda shahardagi “Viktoriya” restoraniga ikki nafar tanishi A.T. va Sh.S. bilan borib, restoran ishchisi S.A.ga “Musiqani o‘chirsang, shu pichoqni peshonangga otaman” deb qo‘rqitib, janjal qilgan.

Oqibatda N.L.ni tinchlantirish uchun restoranga kelgan ichki ishlar organlari va Milliy gvardiya xodimlarining qonuniy talabini bajarish o‘rniga faol qarshilik ko‘rsatib, sherigi A.T. bilan ikki nafar ichki ishlar organlari xodimining yoqasidan tutib, siltab qochishga uringan.

Restorandan ko‘chaga chiqqan N.L. qo‘lidagi pichoq bilan yana bir nafar ichki ishlar organi xodimiga shikast yetkazmoqchi bo‘lganida xodim chap berib yiqilib, tan jarohati olgan.

Ichki ishlar organlari xodimlari tomonidan ko‘rilgan chora-tadbirlar natijasida shu kuni N.L. ushlangan.

Holat yuzasidan Qarshi shahar prokuraturasi tomonidan N.L. va A.T.ga nisbatan jinoyat ishi qo‘zg‘atilib, tergov harakatlari olib borilgan. Tergov harakatlari tamomlanib, sudga yuborilgan.

Jinoyat ishlari bo‘yicha Qarshi shahar sudning 2021-yil 2-avgust kunidagi hukmi bilan N.L va A.T. tegishli jazoga tortilgan.

Bundan avval Qarshida chempion yigitning o‘ldirilishida 8 nafar fuqaro ishtirok etgani, ularning orasida maktab o‘quvchilari ham borligi ma’lum bo‘lgani, Urganchda Malibu haydovchisi YPX xodimlarining qonuniy talabiga bo‘ysunmay, ular bilan janjallashgani hamda O‘zbekistonda so‘nggi 3 yilda 58 nafar ichki ishlar organlari xodimi xizmat vazifasini bajarish vaqtida halok bo‘lgani haqida xabar berilgandi.