Қашқадарёда икки шахс ресторанда жанжал қилиб, ички ишлар ходимларига ҳужум қилди, дея хабар қилмоқда вилояти ИИБ ахборот хизмати.
Қарши шаҳар «Темир йўлчи» МФЙда яшовчи фуқаро Н.Л. 2021 йил 19 февраль куни соат 00:05 ларда шаҳардаги «Виктория» ресторанига икки нафар таниши А.Т. ва Ш.С. билан бориб, ресторан ишчиси С.А.га «Мусиқани ўчирсанг, шу пичоқни пешонангга отаман» деб қўрқитиб, жанжал қилган.
Оқибатда Н.Л.ни тинчлантириш учун ресторанга келган ички ишлар органлари ва Миллий гвардия ходимларининг қонуний талабини бажариш ўрнига фаол қаршилик кўрсатиб, шериги А.Т. билан икки нафар ички ишлар органлари ходимининг ёқасидан тутиб, силтаб қочишга уринган.
Ресторандан кўчага чиққан Н.Л. қўлидаги пичоқ билан яна бир нафар ички ишлар органи ходимига шикаст етказмоқчи бўлганида ходим чап бериб йиқилиб, тан жароҳати олган.
Ички ишлар органлари ходимлари томонидан кўрилган чора-тадбирлар натижасида шу куни Н.Л. ушланган.
Ҳолат юзасидан Қарши шаҳар прокуратураси томонидан Н.Л. ва А.Т.га нисбатан жиноят иши қўзғатилиб, тергов ҳаракатлари олиб борилган. Тергов ҳаракатлари тамомланиб, судга юборилган.
Жиноят ишлари бўйича Қарши шаҳар суднинг 2021 йил 2 август кунидаги ҳукми билан Н.Л ва А.Т. тегишли жазога тортилган.
Бундан аввал Қаршида чемпион йигитнинг ўлдирилишида 8 нафар фуқаро иштирок этгани, уларнинг орасида мактаб ўқувчилари ҳам борлиги маълум бўлгани, Урганчда Malibu ҳайдовчиси ЙПХ ходимларининг қонуний талабига бўйсунмай, улар билан жанжаллашгани ҳамда Ўзбекистонда сўнгги 3 йилда 58 нафар ички ишлар органлари ходими хизмат вазифасини бажариш вақтида ҳалок бўлгани ҳақида хабар берилганди.
Изоҳ (0)