O‘zbekistonga bir kunda 158 nafar Afg‘oniston fuqarosi va harbiy xizmatchisi Amudaryodan o‘tib, noqonuniy kirib kelgan

“Shu kuni 158 nafar afg‘on fuqarolari va qurollangan harbiy xizmatchilari daryo orqali Termiz tumani hududiga O‘zbekiston chegarasidan qonunga xilof ravishda o‘tgan”, — deyiladi idora axborotida.

Qo‘shimcha qilishlaricha, ushbu holat yuzasidan O‘zbekiston bosh prokurori Nig‘matilla Yo‘ldoshev tomonidan Jinoyat kodeksining 223-moddasi 2-qismi “b” bandi (bir guruh shaxslar tomonidan oldindan til biriktirib chegaradan o‘tish) alomatlari bilan jinoyat ishi qo‘zg‘atilgan, tergov harakatlari olib borilmoqda.

Avvalroq Bosh prokuratura 14—15-avgust kunlari Afg‘onistonning 22 ta harbiy samolyoti 24 ta vertolyoti O‘zbekiston havo hududidan chegarasidan noqonuniy o‘tgani, ularning barchasi Termiz xalqaro aeroportiga qo‘ndirilgani, ushbu uchoqlarning bortida jami 585 nafar afg‘onistonlik qurollangan harbiy xizmatchi bo‘lgani haqida ma’lum qilgan edi.

14-avgust kuni Termiz—Hayraton ko‘prigining Afg‘oniston qismida to‘plangan yuzlab afg‘onistonliklar orasidan, O‘zbekiston TIV ma’lumotlariga ko‘ra, “Afg‘oniston Qurolli Kuchlarining harbiy xizmatchilaridan iborat 84 kishilik guruh” qabul qilingan edi. Ular orasida uch yarador borligi aytilgandi.