Qashqadaryo viloyatining Koson tumanida tibbiyot xodimi koronavirusga qarshi vaksina bilan emlanmagan fuqaroga emlanganini tasdiqlovchi noqonuniy ma’lumotnoma yozib berib, bu haqda bazaga ma’lumot kiritayotganda fosh bo‘ldi. Bu haqda “Daryo”ga jurnalist Gulilaylo Tugalova ma’lum qildi.
Ta’kidlanishicha, hamshiraning qing‘ir ishi DXX viloyat boshqarmasi xodimlari ishtirokidagi tadbirda fosh bo‘lgan.“Koson tumani markaziy poliklinikasida COVID-19 ga qarshi emlash jarayonida tibbiyot xodimlari moddiy manfaatdorlik evaziga fuqarolarni vaksina bilan emlamasdan ularga emlanganligi xususida ma’lumotnoma tayyorlab berayotganligi va buni elektron bazaga kiritib kelayotganligi aniqlandi”, — deydi Gulilaylo Tugalova tezkor tadbir o‘tkazgan manba bergan ma’lumotga tayanib.
Qayd etilishicha, Koson tuman markaziy poliklinikasida ishlovchi hamshira M.G. fuqaro J.A. koronavirusga qarshi vaksina olmasa-da, 100 ming so‘m evaziga uni emlangan shaxslar yagona elektron bazasiga kiritayotgani aniqlangan.
Jurnalistga ma’lumot bergan manba tumanda ushbu holat qachondan beri davom etayotgani, ayni kunga qadar nechchi nafar fuqaro emlash olmasa-da, emlangan fuqarolar ro‘yxatiga kiritilib, bazada qayd etilganiga aniqlik kiritmagan.
Eslatib o‘tamiz, Sog‘liqni saqlash vazirligi avvalroq O‘zbekistonda koronavirusga qarshi to‘liq emlanganlar soni 1,4 million kishiga yaqinlashganini ma’lum qilgandi.
Izoh (0)