Telegram’da Surxondaryo viloyati hokimi To‘ra Bobolovning Toshkent shahridan 900 ming dollarga uy xarid qilgani aytilgan video tarqaldi. “Daryo” muxbiri bilan suhbatlashgan To‘ra Bobolovning matbuot kotibi esa mazkur ma’lumotni rad etdi.
Surxondaryo viloyati hokimligi axborot xizmati rahbari Zahiriddin To‘rayevning ma’lumot berishicha, bu video ikki oy ilgari viloyat hokimi To‘ra Bobolovning e’tiborini tortgan.“Viloyat rahbari Toshkentdan uy olganligini eshitgach, bu haqda gap tarqatgan Shoberdi Suyunov bilan o‘zlari gaplashib, bu gapni qayerdan olgani bilan qiziqqandi”, — deydi Zahiriddin To‘rayev “Daryo” muxbiri so‘roviga javob berar ekan.
Zahiriddin To‘rayev viloyat rahbariga tegishli uylar haqidagi ma’lumotga aniqlik kiritar ekan, “Qishloqda onalarining, Termizda esa o‘zlarining uyi bor”, — dedi.
To‘ra Bobolov ish faoliyati davomida vafot etgani to‘g‘risidagi xabarga ham duch kelgan va bunga javoban o‘zi shifoxonadan videomurojaat yo‘llab, tirik ekanini ma’lum qilgandi.
Eslatib o‘tamiz, To‘ra Bobolov 2020-yil 13-yanvar kuni Surxondaryo viloyati hokimi lavozimiga tasdiqlangandi.
Izoh (0)