Қашқадарё вилоятининг Косон туманида тиббиёт ходими коронавирусга қарши вакцина билан эмланмаган фуқарога эмланганини тасдиқловчи ноқонуний маълумотнома ёзиб бериб, бу ҳақда базага маълумот киритаётганда фош бўлди. Бу ҳақда «Дарё»га журналист Гулилайло Тугалова маълум қилди.
Таъкидланишича, ҳамширанинг қинғир иши ДХХ вилоят бошқармаси ходимлари иштирокидаги тадбирда фош бўлган.«Косон тумани марказий поликлиникасида COVID-19 га қарши эмлаш жараёнида тиббиёт ходимлари моддий манфаатдорлик эвазига фуқароларни вакцина билан эмламасдан уларга эмланганлиги хусусида маълумотнома тайёрлаб бераётганлиги ва буни электрон базага киритиб келаётганлиги аниқланди», — дейди Гулилайло Тугалова тезкор тадбир ўтказган манба берган маълумотга таяниб.
Қайд этилишича, Косон туман марказий поликлиникасида ишловчи ҳамшира М.Г. фуқаро Ж.А. коронавирусга қарши вакцина олмаса-да, 100 минг сўм эвазига уни эмланган шахслар ягона электрон базасига киритаётгани аниқланган.
Журналистга маълумот берган манба туманда ушбу ҳолат қачондан бери давом этаётгани, айни кунга қадар неччи нафар фуқаро эмлаш олмаса-да, эмланган фуқаролар рўйхатига киритилиб, базада қайд этилганига аниқлик киритмаган.
Эслатиб ўтамиз, Соғлиқни сақлаш вазирлиги аввалроқ Ўзбекистонда коронавирусга қарши тўлиқ эмланганлар сони 1,4 миллион кишига яқинлашганини маълум қилганди.
Изоҳ (0)