80 dan ortiq afg‘onistonlik harbiy xizmatchilar O‘zbekiston davlat chegarasini kesib o‘tdi va chegarachilar tomonidan qo‘lga olindi. Bu haqda O‘zbekiston Tashqi ishlar vazirligi rasmiy vakili Yusup Kabuljanov ma’lum qildi.
“2021-yilning 14-avgust kuni Afg‘oniston bilan davlat chegarasining bo‘linmalaridan birida Afg‘oniston Qurolli Kuchlarining harbiy xizmatchilaridan iborat 84 kishilik guruh davlat chegarasini kesib o‘tdi va DXX Chegara qo‘shinlari chegara otryadlari tomonidan qo‘lga olindi. Chegarani buzganlar qarshilik ko‘rsatmagan va ko‘makka muhtojligini bildirgan, jumladan, 3 nafar yaralangan shaxsga tibbiy yordam so‘ragan”, — deyiladi xabarda.Bundan tashqari, 14-avgust kun davomida Termiz—Mozori-Sharif temiryo‘l uchastkasida xizmat ko‘rsatuvchi O‘zbekiston fuqarolarini vatanga qaytarish tashkil etilgan.Afg‘onistonning mazkur fuqarolari bilan zarur tekshiruv-filtrlash jarayonlari va sanitariya-epidemiologiya tadbirlari o‘tkazilgan, ularning ayrimlariga tibbiy yordam ko‘rsatilgan, shuningdek, oziq-ovqat va ularning vaqtincha joylashishi tashkil etilgan.
Shu bilan birga, Termiz—Hayraton ko‘prigining Afg‘oniston qismida Afg‘oniston hukumat kuchlarining harbiy xizmatchilari to‘plangani qayd etildi. Bu shaxslarga insonparvarlik yordami ko‘rsatish choralari ko‘rilmoqda.
“O‘zbekiston Tashqi ishlar vazirligi Afg‘oniston fuqarolarining vataniga qaytishi va Termiz—Hayraton ko‘prigi hududidagi vaziyatni tartibga solish borasida Afg‘oniston tomoni bilan muzokaralar olib bormoqda”, — deyiladi TIV xabarida.
Ta’kidlanishicha, davlat chegarasini qo‘riqlash va himoya qilish kuchaytirilgan tartibda olib borilmoqda, barcha zarur xavfsizlik choralari ko‘rilgan. Termizda xavfsizlik idoralari rahbarlari va davlat hokimiyati organlari vakillaridan iborat tezkor shtab joylashtirilgan.
Afg‘onistondagi vaziyatni yoritib boruvchi kanallardan birida 15-avgust kuni soat 9:18 da joylashtirilgan xabarga ko‘ra, Termiz va Hayratonni bog‘lab turuvchi ko‘prik hamon afg‘onistonliklar bilan to‘la, chegara yopiq (“minglab afg‘onistonlik jangchilar Hayraton ko‘prigi ochilib, undan o‘tishni kutmoqda”). “O‘zbekiston chegarachilari faqat yuqori martabali afg‘on amaldorlarining kirishiga ruxsat bergan”, — deyiladi kanaldagi xabarda.
Avvalroq “Tolibon” Afg‘oniston shimoli-g‘arbidagi Balx viloyati ma’muriy markazi hisoblangan Mozori-Sharif shahrini egallagani, Afg‘oniston hukumat kuchlari O‘zbekiston tomon qochgani, Termizdagi “Do‘stlik ko‘prigi” afg‘on harbiylari bilan to‘la ekani xabar berilgan edi.
Afg‘onistondagi o‘zbeklar yetakchisi sifatida ko‘riladigan marshal Abdurashid Do‘stum va mamlakatdagi tojik millatiga mansub aholi yetakchisi, Balx viloyatining sobiq gubernatori Ato Muhammad Nur hozirgi vaqtda “xavfsiz joyda” bo‘lib turgani ma’lum qilingan, ayrim manbalarga ko‘ra, ular vertolyotda O‘zbekistonga uchib ketgan bo‘lishi mumkin.
Izoh (0)