Ijtimoiy tarmoqlarda Qashqadaryo viloyati Koson tumani tibbiyot birlashmasi xodimlari majburiy mehnatga jalb qilingani haqida xabar tarqaldi. Unda shifokorlar, hamshiralar bir haftadan beri hasharda ekanligi aytilgan.
Foto: Mehnat vazirligi matbuot xizmati
Mehnat vazirligi matbuot xizmatining ma’lum qilishicha, ushbu xabar yuzasidan Qashqadaryo viloyati Bandlik bosh boshqarmasi Davlat mehnat inspeksiyasi tomonidan o‘rganish olib borilganida, tibbiyot birlashmasi xodimlari boshqa hududdagi obodonlashtirish ishlariga majburiy tarzda jalb etilganligi aniqlandi.
Mazkur holat bo‘yicha Koson tumani tibbiyot birlashmasi boshlig‘iga nisbatan Ma’muriy javobgarlik to‘g‘risidagi kodeksning 51-moddasi 1-qismiga asosan bazaviy hisoblash miqdorining 50 barobari (12 million 250 ming so‘m) miqdorida ma’muriy jarima qo‘llanildi.
Bundan avval O‘rta Chirchiqda tibbiyot xodimlarini majburiy mehnatga jalb etgan poliklinika rahbari shuncha miqdorda jarimaga tortilgan haqida xabar berilgan edi.
