Navoiy shahrida joylashgan gaz quyish shoxobchasida 12-avgust kuni portlash sodir bo‘lib, yong‘in kelib chiqishi oqibatida 4 kishi turli darajada kuyish tan jarohatini olgandi. Sanoat xavfsizligi davlat qo‘mitasining “Daryo”ga ma’lum qilishicha, mazkur holat yuzasidan Navoiy viloyati IIB huzuridagi TB tomonidan Jinoyat kodeksining 259-moddasi 2-qismi “b” bandi (yong‘in xavfsizligi qoidalarini buzish og‘ir oqibatlar kelib chiqishiga sabab bo‘lishi) bilan jinoyat ishi qo‘zg‘atilib, tergov harakatlari olib borishga kirishilgan.
Qo‘mitaning ma’lum qilishicha, portlash 12-avgust kuni soat 19:15 da Navoiy shahar, “Kimyogar” mahalla fuqarolar yig‘ini Inspektorlar ko‘chasida joylashgan Propan Best avtomobillarga gaz quyish shoxobchasida propan gaz to‘kilishi oqibatida yuzaga kelgan. Shu vaqtda yo‘ldan harakatlanib kelayotgan “Moskvich” portlash zarbidan ag‘darilishi natijasida 38 yoshli haydovchi A.Baxronov, yo‘lovchilar: 25 yoshli S.Islomov va 23 yoshli M.Ravshanov, shuningdek, sodir bo‘lgan portlashni ko‘rgan 35 yoshli Nexia haydovchisi A.Raimov avtomashinadan tushib qochayotgan vaqtida turli darajadagi tan jarohatlari olib, tibbiyot birlashmasiga yotqizilgan.
Quyida gaz-zapravkaning hodisadan keyingi holati aks etgan suratlar taqdim etildi.
Izoh (0)