O‘zbekiston Mudofaa vazirligi harbiy xizmatchilarining qariyb 100 foizi COVID-19 ga qarshi emlandi, deb xabar bermoqda vazirlik matbuot xizmati.
Qayd etilishicha, harbiy xizmatchilarning 94,7 foizi — vaksinaning birinchi dozasini, 91,6 foizi — ikkinchi dozasini, 61,1 foizi esa uchinchi dozasini olgan. Emlashda, asosan, ZF-UZ-VAC-2001 xitoy—o‘zbek vaksinasidan, shuningdek, “Sputnik V” va Moderna vaksinalaridan foydalanilmoqda.
Mudofaa vazirligi Sanitariya-epidemiologiya nazorati markazi boshlig‘i, tibbiy xizmat podpolkovnigi Jamshid Shakirovning ta’kidlashicha, avgust oyidan boshlab Qurolli Kuchlarning boshqa ishchi va xizmatchilarini emlash yo‘lga qo‘yildi.
Emlash ishlarini sifatli tashkil etish maqsadida Mudofaa vazirligi harbiy qism va muassasalar tibbiyot xodimlaridan 647 nafar vaksinator tayyorlangan. Tibbiyot punktlarida 81 ta emlash punkti, Markaziy harbiy klinik gospitali, Markaziy shifoxona va harbiy gospitallarda 8 ta emlash brigadasi tashkil etilgan.
Sog‘liqni saqlash vazirligi ma’lumotlariga ko‘ra, 11-avgustga kelib O‘zbekistonda jami 11 382 468 doza vaksinadan foydalanilgan bo‘lib, ulardan 1-bosqich emlanganlar 8 049 126 nafarni, 2-bosqichda emlanganlar 2 423 846 nafarni, 3-bosqich emlanganlar 909 496 nafarni tashkil qildi. Shu kungacha to‘liq emlangan fuqarolar esa 1 371 257 nafarni tashkil qilmoqda.
Izoh (0)