O‘zbekistonda tashkil etilgan “Lyubaya biznes xorosha”, “Plati-leti”, “S 707” va boshqa MChJ mansabdorlariga jinoiy ish ochilgani haqida xabar berilgandi. Bosh prokuratura “Daryo”ning so‘roviga asosan bergan ma’lumotlarga ko‘ra, ushbu jinoiy ishni sudga yuborish arafasida.
Qayd etilishicha, Bosh prokuratura huzuridagi Departamentining Mirzo Ulug‘bek tumani bo‘limi tomonidan “Lyubaya biznes xorosha”, “Plati-leti”, “S 707” va boshqa MChJ mansabdor shaxslariga nisbatan Jinoyat kodeksining 179-moddasi 1-qismi (soxta tadbirkorlik), 184-moddasi 3-qismi (soliqlar yoki boshqa majburiy to‘lovlarni to‘lashdan bo‘yin tovlash), 189-moddasi 1-qismi (savdo yoki xizmat ko‘rsatish qoidalarini buzish) bilan jinoyat ishi qo‘zg‘atilgan.
Mazkur jinoyat ishi bo‘yicha Toshkent shahar prokuraturasi tomonidan dastlabki tergov harakatlari olib borilib, yuqorida ko‘rsatilgan jamiyatlarning moliyaviy-xo‘jalik faoliyatini olib borgan 2 nafar shaxsga nisbatan Jinoyat kodeksining tegishli moddalari bilan ayb e’lon qilib, jinoyat ishini mazmunan ko‘rib chiqishlik uchun sudga yuborish arafasida.
Ma’lumot uchun, 2020-yil iyunida Surxondaryoda “Voy Mani Okahonlarim” nomli, yirik shoxli qoramollarning sut beradigan zotlarini ko‘paytirish bilan shug‘ullanuvchi oilaviy korxona ro‘yxatdan o‘tkazilgan edi. Keyinchalik korxona nomi “Akbar Ali Adolat” deb o‘zgartirilgan. 2020-yil mayida Jizzax viloyatida “Vapshe malades bala” nomli, keng assortimentdagi tovarlar ulgurji savdosi bo‘yicha agentlar faoliyati bilan shug‘ullanuvchi kompaniya ro‘yxatdan o‘tkazilgani ma’lum bo‘lgan.
Izoh (0)