O‘zbekiston Respublikasi Prezidenti huzuridagi Orolbo‘yi xalqaro innovatsiya markazi direktori Nurlibek Mirzamuratov olamdan o‘tdi. Bu haqda Innovatsion rivojlanish vazirligi ma’lum qildi.
Vazirlikning “Daryo”ga ma’lum qilishicha, Nurlibek Mirzamuratov avval koronavirusga chalingan. Mart oyida insult bo‘lgan, 12-avgustda ushbu kasallik qayta xuruj qilishi oqibatida vafot etgan.
Ma’lumot uchun, Mirzamuratov Nurlibek Yusupovich 1963-yil 4-sentabrda Qoraqalpog‘iston Respublikasi Chimboy tumanida tug‘ilgan, millati qoraqalpoq, ma’lumoti oliy. 1990-yilda Toshkent avtomobil yo‘llari institutini tamomlagan, mutaxassisligi bo‘yicha muxandis-quruvchi.
“Adolat” sotsial demokratik partiyasi a’zosi, 2012—2014-yillar oralig‘ida Xalq deputatlari Mo‘ynoq tumani kengesi deputati, 2014—2019-yillar oralig‘ida Qoraqalpog‘iston Respublikasi Jo‘qorg‘i Kengesi deputati bo‘lgan.
1996-yilda “EKOSAN” xalqaro tashkiloti Qoraqalpog‘iston filiali yetakchi mutaxassisi, 1996—2005-yillar “EKOSAN” xalqaro tashkiloti Qoraqalpog‘iston filiali direktorining o‘rinbosari, 2005-yildan 2018-yilgacha “EKOSAN” xalqaro xayriya jamoat fondining Qoraqalpog‘iston hududiy tashkilotining direktori lavozimida ishlab kelgan. 2018-yil oktabr oyidan umrining oxirgi kunlarigacha O‘zbekiston Prezidenti huzuridagi Orolbo‘yi xalqaro innovatsiya markazi direktori lavozimida faoliyat yuritib keldi.
2020-yilda O‘zbekiston hukumati tomonidan “Vatan fidoyisi” ko‘krak nishoni bilan taqdirlangan.
Bundan avval Andijon tumaniga 13 yil hokimlik qilgan Hasanboy Hakimov, “Shaytanat”dagi Abdurahmon tabib — O‘zbekistonda xizmat ko‘rsatgan artist Muhammad Rafiqov 81 yoshida hamda “Madaniyat va ma’rifat” telekanalining xodimi 37 yoshida koronavirus oqibatida vafot etgani haqida xabar berilgandi.
Izoh (0)