Ўзбекистон Республикаси Президенти ҳузуридаги Оролбўйи халқаро инновация маркази директори Нурлибек Мирзамуратов оламдан ўтди. Бу ҳақда Инновацион ривожланиш вазирлиги маълум қилди.
Вазирликнинг «Дарё»га маълум қилишича, Нурлибек Мирзамуратов аввал коронавирусга чалинган. Март ойида инсульт бўлган, 12 августда ушбу касаллик қайта хуруж қилиши оқибатида вафот этган.
Маълумот учун, Мирзамуратов Нурлибек Юсупович 1963 йил 4 сентябрда Қорақалпоғистон Республикаси Чимбой туманида туғилган, миллати қорақалпоқ, маълумоти олий. 1990 йилда Тошкент автомобиль йўллари институтини тамомлаган, мутахассислиги бўйича мухандис-қурувчи.
«Адолат» социал демократик партияси аъзоси, 2012—2014 йиллар оралиғида Халқ депутатлари Мўйноқ тумани кенгеси депутати, 2014—2019 йиллар оралиғида Қорақалпоғистон Республикаси Жўқорғи Кенгеси депутати бўлган.
1996 йилда «ЭКОСАН» халқаро ташкилоти Қорақалпоғистон филиали етакчи мутахассиси, 1996—2005 йиллар «ЭКОСАН» халқаро ташкилоти Қорақалпоғистон филиали директорининг ўринбосари, 2005 йилдан 2018 йилгача «ЭКОСАН» халқаро хайрия жамоат фондининг Қорақалпоғистон ҳудудий ташкилотининг директори лавозимида ишлаб келган. 2018 йил октябрь ойидан умрининг охирги кунларигача Ўзбекистон Президенти ҳузуридаги Оролбўйи халқаро инновация маркази директори лавозимида фаолият юритиб келди.
2020 йилда Ўзбекистон ҳукумати томонидан «Ватан фидойиси» кўкрак нишони билан тақдирланган.
Бундан аввал Андижон туманига 13 йил ҳокимлик қилган Ҳасанбой Ҳакимов, «Шайтанат»даги Абдураҳмон табиб — Ўзбекистонда хизмат кўрсатган артист Муҳаммад Рафиқов 81 ёшида ҳамда «Маданият ва маърифат» телеканалининг ходими 37 ёшида коронавирус оқибатида вафот этгани ҳақида хабар берилганди.
Изоҳ (0)