Россиянинг Сизран шаҳридаги чорвачилик фермасида мажбурий меҳнатга жалб қилинган икки ўзбекистонликка ёрдам берилди. Бу ҳақда Ташқи меҳнат миграцияси агентлиги хабар берди.
Маълум қилинишича, ўзбекистонлик мигрант А.А. агентликнинг Россиянинг Самара шаҳридаги ваколатхонасига мурожаат қилиб, Сизран шаҳридаги чорвачилик фермасида ишлаб, ойлик иш ҳақини ололмаётгани, паспорти олиб қўйилиб, жисмоний куч ишлатилганини маълум қилган.
Ваколатхона ходимлари томонидан ўрнатилган тартибда телефон орқали ҳудудий ички ишлар бўлимига мурожаат қилинган, лекин ички ишлар ходимлари келиб, ушбу фуқарони сўровдан ўтказган ва яна ушбу иш берувчи қўлига топширган.
Муаммо ваколатхона ходимлари томонидан жойига чиқиб ўрганилган ҳамда фуқаронинг паспорти ва 12 минг рубль ойлик маоши ундириб берилган.
Шунингдек, мазкур фермада ишлаётган Ўзбекистоннинг яна бир фуқароси Р.Ж. ҳам паспорти олиб қўйилиб, мажбурий меҳнатга жалб қилинаётгани аниқланган. Унинг ҳам ҳужжати олиб берилиб, ҳар икки фуқаро бошқа ишга жойлаштирилган.
Бундан аввал Россиянинг Самара вилоятидаги иссиқхонада мажбурий меҳнатдан озод қилинишини сўраган 6 нафар ўзбекистонликка ёрдам берилгани, Приморск ўлкасида иш берувчи томонидан паспортлари олиб қўйилган ўзбекистонликларга ёрдам берилгани ҳақида хабар берилган эди.
Изоҳ (0)