Ўзбекистон Республикаси Президентининг 2017 йил 7 августдаги фармонига мувофиқ, август ойининг иккинчи якшанбаси Қурилиш соҳаси ходимлари куни, деб эълон қилинган ва бу сана мамлакатимиз бўйлаб кенг нишонланади. 8 августда Enter Engineering компаниялари гуруҳининг энг йирик учта объектида ушбу санага бағишланган тантанали тадбирлар бўлиб ўтди. Самарқанд, Қашқадарё ва Сурхондарё вилоятлари ҳокимликлари кўмагида ҳар бир объект маъмурияти томонидан байрам тадбирларини юқори даражада ўтказиш бўйича қатор тайёргарлик тадбирлари амалга оширилди.
Байрам тадбирлари Сайёҳлик маркази қурилиши майдонида (Самарқанд вилояти, Самарқанд тумани), «Мустақилликнинг 25 йиллиги» конида (Сурхондарё вилояти, Бойсун тумани) ҳамда UzGtl Gtl технологияси бўйича синтетик ёқилғи ишлаб чиқариш бўйича заводда (Қашқадарё вилояти, Ғузор тумани) бўлиб ўтди.
Байрам тадбирларида қурилаётган объектларнинг ишчилари томошабин тарзида иштирок этишди. Она диёримизнинг табиат неъматлари билан безатилган тўкин байрам дастурхони атрофидаги кечки таомдан сўнг барча ишчи ходимлар майдонга йиғилди ва лойиҳа раҳбарларининг табрик нутқларини тинглашди. Тадбирда, шунингдек, маҳаллий бошқарув органлари, ҳокимликлар вакиллари ҳам қатнашди, барча йиғилганларни Қашқадарё вилояти ҳокими ўринбосари Турсунов Шуҳрат Ҳамидович, Сурхондарё вилояти ҳокимининг қурилиш ишлари бўйича ўринбосари Хидиров Алишер Бўриевич, Бойсун тумани ҳокими Асқарали Жўраев ва Самарқанд тумани ҳокими Мавлонов Носир Мамарасулович касб байрами билан табриклашди.
Байрамга ташкилотчилар томонидан махсус таклиф этилган таниқли санъаткорларнинг мусиқали чиқишлари алоҳида файз бағишлади. Enter Engineering ишчилари сафида кўплаб хорижлик мутахассислар ҳам ишлаётгани боис концерт дастурларида дунёнинг турли тилларида куйланувчи куй-қўшиқлар ҳам ижро этилди. Байрам тадбирлари барча объектларда санитария-эпидемиология талабларига қатъий риоя этилган ҳолда, юксак даражада ташкиллаштирилди. Қурувчилар кунига бағишланган байрам тадбирлари барчага кўтаринки кайфият бағишлади, ҳар бир қурувчи ишчи ўз меҳнатининг аҳамиятини, жамоавий руҳини ҳис этди.
Enter Engineering матбуот хизмати
Изоҳ (0)