Афғонистон хавфсизлик кучлари «Толибон» ҳаракати жангарилари билан жангларда мамлакат шимолидаги Қундуз ва Сарипул вилоятларининг маъмурий марказлари устидан назоратни қўлдан бой берди. Шунингдек, «Толибон» ҳаракати Тожикистон билан чегара яқинида жойлашган Тохар шимолий вилояти пойтахти Талукан шаҳрини эгаллаб олганини маълум қилди. Шу тариқа «Толибон» назорати остига ўтган вилоят марказлари сони бештага етди, деб ёзади Anadolu агентлиги.
Сарипул вилояти маҳаллий кенгаши депутати Асадулла Хуррам маълум қилишича, жангарилар 7 август, шанба куни маъмурий марказга ҳужум бошлаган, 8 август, якшанба куни у тўлиқ «Толибон» назорати остига ўтган. Хавфсизлик кучлари шаҳар ташқарисидаги ҳарбий лагерга чекинган.
Қундуз маҳаллий кенгаши депутати Амриддиний Валий, ўз навбатида, вилоятнинг маъмурий маркази икки кун давом этган тўқнашувлардан кейин «Толибон» қўлига ўтганини маълум қилди. Унинг сўзларига кўра, полиция маъмурий бинолари ҳам жангарилар назорати остида. Хавфсизлик кучлари ва маҳаллий ҳукумат Қундуз аэропортига чекинган. Гувоҳлар сўзларига кўра, Қундузни эгаллаб олгач, жангарилар қамоқхоналардан маҳбусларни озод қилган.
Шунингдек, 8 август, якшанба куни «Толибон» ҳаракати Тохар шимолий вилояти маъмурий маркази — Талукан шаҳрини эгаллаб олганини эълон қилди. Вилоят қонун чиқарувчи органи раиси ўринбосари Рухолла Рауфий маълум қилишича, хавфсизлик кучлари ходимлари ва маҳаллий ҳукумат вакиллари Фархар уездига бориб жойлашган.
Унинг сўзларига кўра, жангарилар барча жамоатчилик биноларига кириб борган ҳамда маҳаллий қамоқхоналардан маҳбусларни озод қилган. Улар Талуканга тахминан икки ҳафта аввал ҳужум бошлаган.
«Толибон»нинг ўзи берган баёнотга кўра, гуруҳ Талукандаги барча жамоатчилик бинолари устидан назорат ўрнатган.
Талуканнинг қулаши билан, «Толибон» назорати остига ўтган Афғонистон вилоятлари маъмурий марказлари сони бештага етди.
Жузжон вилоятига берилган авиазарбадан олдин «Толибон» икки кеча-кундуз давом этган жанглар оқибатида вилоятнинг Шибирғон шаҳрини қўлга киритган эди. У «Толибон» томонидан сўнгги бир сутка ичида эгаллаб олинган иккинчи маъмурий марказга айланганди.
Бунгача улар Эрон билан чегарадаги Нимруз вилояти пойтахти Саранж шаҳрига бостириб кирган эди, бу эса «Толибон» сўнгги беш йил ичида Афғонистон вилоятларидан бирининг маъмурий марказини эгаллаб олиши билан боғлиқ биринчи ҳолат бўлди.
Изоҳ (0)