Qashqadaryoda 2021-yil yakuniga qadar 900 xonadonli 35 ta arzonlashtirilgan ko‘p qavatli uy quriladi. Bu haqda “Daryo”ga “Qishloqqurilishinvest” injiniring kompaniyasi Qashqadaryo viloyat filiali direktori Qo‘yli Narzullayev ma’lum qildi.
Ta’kidlanishicha, mazkur uy-joylar Prezidentning 2021-yil 11-martdagi “Bozor tamoyillariga asoslangan ipoteka kreditlarini ajratish orqali aholini uy-joy bilan ta’minlashga oid qo‘shimcha chora-tadbirlar to‘g‘risida”gi farmoniga asosan qurib bitkazilmoqda.Qo‘yli Narzullayevga ko‘ra, qiymati 138 milliard 100 million so‘m bo‘lgan uy-joylarning 60 xonadonlilari Kasbi, Koson, Nishon va Muborak tumanlarida qurilsa, 40 xonadonli uylar Mirishkor, Chiroqchi, Dehqonobod, Yakkabog‘, Qamashi tumanlarida quriladi. Qarshi va Kitob tumanlarida 120 xonadonli, Shahrisabz tumanida esa 180 xonadonli uy-joylar quriladi.
“Ko‘pchilik yurtdoshlarimizda shunday uy-joylardan olish uchun nima qilish kerak degan savol tug‘ilyapti. Dasturdagi arzon uy-joylardan olish uchun fuqaro tuman hokimligi huzuridagi talabgorlarni aniqlash komissiyasiga ariza bilan murojaat qilib, hujjatlarini taqdim etishi kerak”, — deydi Qo‘yli Narzullayev.
Qo‘yli Narzullayevning qo‘shimcha qilishicha, 2021-yil yakuniga qadar aholi talabidan kelib chiqib Shahrisabz tumanida yana 540 xonadonli 27 ta uy qurilishi ham rejalashtirilgan bo‘lib, qurilish ishlari boshlanish arafasida turibdi.
Ma‘lumot berilishicha, “Qishloqqurilishinvest” injiniring kompaniyasining Qashqadaryo viloyat filiali 2020-yil yakuniga qadar viloyatda 1140 xonadonli 47 ta arzonlashtirilgan ko‘p qavatli kvartira qurgan.
Izoh (0)