Қашқадарёда 2021 йил якунига қадар 900 хонадонли 35 та арзонлаштирилган кўп қаватли уй қурилади. Бу ҳақда «Дарё»га «Қишлоққурилишинвест» инжиниринг компанияси Қашқадарё вилоят филиали директори Қўйли Нарзуллаев маълум қилди.
Таъкидланишича, мазкур уй-жойлар Президентнинг 2021 йил 11 мартдаги «Бозор тамойилларига асосланган ипотека кредитларини ажратиш орқали аҳолини уй-жой билан таъминлашга оид қўшимча чора-тадбирлар тўғрисида»ги фармонига асосан қуриб битказилмоқда.Қўйли Нарзуллаевга кўра, қиймати 138 миллиард 100 миллион сўм бўлган уй-жойларнинг 60 хонадонлилари Касби, Косон, Нишон ва Муборак туманларида қурилса, 40 хонадонли уйлар Миришкор, Чироқчи, Деҳқонобод, Яккабоғ, Қамаши туманларида қурилади. Қарши ва Китоб туманларида 120 хонадонли, Шаҳрисабз туманида эса 180 хонадонли уй-жойлар қурилади.
«Кўпчилик юртдошларимизда шундай уй-жойлардан олиш учун нима қилиш керак деган савол туғиляпти. Дастурдаги арзон уй-жойлардан олиш учун фуқаро туман ҳокимлиги ҳузуридаги талабгорларни аниқлаш комиссиясига ариза билан мурожаат қилиб, ҳужжатларини тақдим этиши керак», — дейди Қўйли Нарзуллаев.
Қўйли Нарзуллаевнинг қўшимча қилишича, 2021 йил якунига қадар аҳоли талабидан келиб чиқиб Шаҳрисабз туманида яна 540 хонадонли 27 та уй қурилиши ҳам режалаштирилган бўлиб, қурилиш ишлари бошланиш арафасида турибди.
Маълумот берилишича, «Қишлоққурилишинвест» инжиниринг компаниясининг Қашқадарё вилоят филиали 2020 йил якунига қадар вилоятда 1140 хонадонли 47 та арзонлаштирилган кўп қаватли квартира қурган.
Изоҳ (0)