AQSh hukumati kelasi hafta boshida Belarusga qarshi yangi sanksiyalar paketi joriy etilganini e’lon qilishi mumkin. Bu haqda CNN telekanali AQSh Kongressidagi manbalariga tayanib xabar tarqatgan.
Ma’lumotlarga ko‘ra, Belarusga qarshi yangi cheklovlar 9-avgust kuni, ya’ni mamlakatdagi saylovlarga roppa-rosa bir yil to‘lganida e’lon qilinadi. AQSh Moliya vazirligi, davlat departamenti va Oq uy “TASS” agentligining ushbu axborotni tasdiqlash yoki bu bo‘yicha qo‘shimcha ma’lumot berish yuzasidan so‘roviga javob bermagan.
Ushbu qarorlar AQShga Belarus prezidentligi uchun sobiq nomzod, muxolifat vakili Svetlana Tixanovksayaning Nyu-Yorkda Belarus diasporasi, Vashington vakillari bilan uchrashuvlarda Minskka qarshi sanksiyalarni kengaytirish bo‘yicha murojaat qilgani va bu borada unga hech qanday va’dalar berilmagani tufayli chiqarilgan bo‘lishi mumkin.
O‘z navbatida Tixanovskayaning Vashingtonga safari haqida yetarlicha ma’lumotga ega bo‘lgan manba “TASS” agentligiga AQShning Belarusga qarshi yangi sanksiyalar borasida ish olib borayotganini bildirgan, ammo u ham aynan qaysi sohalarga nisbatan cheklovlar o‘rnatilishiga aniqlik kiritmagan.
“Tixanovskaya AQSh hukumati vakillaridan bu haqda iltimos qilgan, lekin Vashington sanksiyalar joriy etish yoki etmaslik masalasini mustaqil belgilaydi”, – deya qo‘shimcha qilgan manba.
Belarusda 2020-yil 9-avgustda prezidentlik saylovlari o‘tkazilgan va unda Markaziy saylov komissiyasi ma’lumotlariga ko‘ra amaldagi prezident Aleksandr Lukashenko g‘alaba qozongan. Tixanovskaya ikkinchi o‘rinni egallagan va saylovlar haqqoniy o‘tmaganligini bildirib, mamlakatdan chiqib ketgan. Keyinchalik Tixanovksaya tashabbusi bilan Muxolifat muvofiqlashtiruvchi kengashi tuzilgan va uning asosiy vazifasi hukumatdan boshqaruvni olish deb belgilangan. Keyinchalik kengash faoliyati respublikaning amaldagi hukumati tomonidan noqonuniy deb topilgan.
Avval Svetlana Tixanovskayaning Buyuk Britaniya bosh vaziri Boris Jonson bilan uchrashgani, tadbirda Belarusdagi fuqarolik jamiyati, siyosiy mahbuslar va ularning oilalariga, talabalarga, tibbiyot xodimlari, ishchilar va boshqa aholi qatlamlariga yordam berish dasturini muhokama qilingani haqida xabar berilgandi.
Izoh (0)