AQSh o‘ta xavfli global terrorchilar ro‘yxatini kengaytirdi

AQSh davlat departamenti jangari deb taxmin qilingan besh kishini o‘ta xavfli global terrorchilar ro‘yxatiga qo‘shganini e’lon qildi. Oq uy AQShda jangarilar egalik qilishi mumkin bo‘lgan mulklarning har qanday huquq va manfaatlarini cheklashni talab qiladi, deb yozmoqda Reuters.

AQSh sanksiyalari, shuningdek, bu odamlar bilan muayyan bitimlar tuzgan shaxslar yoki xorijiy moliya institutlariga nisbatan qo‘llaniladi. Qora ro‘yxatga, xususan, IShIDning Mozambikdagi bo‘linmasi katta harbiy qo‘mondoni Bonomada Machude Omar kiritilgan. AQSh davlat kotibi Entoni Blinkenning so‘zlariga ko‘ra, Omar shu yilning mart oyida Mozambikning Palma shahriga hujum qilib, o‘nlab odamlarni o‘ldirgan ekstremistlar guruhiga rahbarlik qilgan.

Ro‘yxatga Omardan tashqari quyidagilar kiritildi: “Al-Qoida”ga aloqador Malidagi “Jamoat Nusrat al-Islom val-Muslimin” tashkilotining yuqori rahbarlari Sidang Xitta va Salim uld al-Hasan, shuningdek, “Ash-Shabaab” guruhining yetakchilari Ali Muhammad Rage va Abduqodir Muhammad Abduqodir.

Avvalroq “Al-Qoida” AQShga qarshi “har tomondan hujum qilish” bilan keng ko‘lamli urush boshlashni va’da qilgandi. Terrorchilik tashkiloti vakillari ushbu urushning “AQSh butun islom dunyosidan chiqarib yuborilgunga qadar” davom etishini qayd etgan.