AQSh davlat kotibi Entoni Blinken Janubi-sharqiy Osiyo davlatlari tashqi ishlar vazirlari bilan uchrashuvda Xitoyning yadroviy qurollari keskin ko‘payib borayotganidan xavotir bildirdi. Bu haqda Axios xabar berdi.
Blinken, shuningdek, XXRni Janubiy Xitoy dengizidagi provokatsiyalarni to‘xtatishga chaqirdi hamda Tibet, Gonkong va Shinjonda inson huquqlari buzilayotganidan tashvishda ekanini ma’lum qildi.
Pekin va Vashington qurollarni nazorat qilish bo‘yicha o‘zaro kelishuvlarga ega emas. Shu bilan birga, Qo‘shma Shtatlar bir necha bor XXRni yadroviy qurollarning tarqalishiga yo‘l qo‘ymaslik bo‘yicha Rossiya bilan birgalikda uch tomonlama shartnoma tuzishga chaqirgan. 2020-yilning iyul oyida Xitoy hukumati AQShning uch tomonlama muzokaralar boshlash taklifini qabul qilish niyatida emasligini aytgan.
2021-yilning iyul oyida Amerika olimlari federatsiyasi Xitoyda taxminan 350 ta faol yadroviy kallak borligini ma’lum qildi.
Stokgolm tinchlik tadqiqot instituti (SIPRI) ma’lumotlariga ko‘ra, yadroviy kuchga ega 9 ta davlat — AQSh, Rossiya, Buyuk Britaniya, Fransiya, Xitoy, Hindiston, Pokiston, Isroil va KXDRda 2021-yil boshidagi holatga ko‘ra, jami 1380 ta yadro quroli bor. SIPRI ma’lumotlariga ko‘ra, ushbu mamlakatlar 2020-yil boshida 13,400 dona qurolga egalik qilardi.
Yadro qurolini yo‘q qilish bo‘yicha xalqaro kampaniya (ICAN) hisobotiga ko‘ra, yadro quroliga ega mamlakatlar ushbu turdagi qurolga 2020-yilda 72,6 milliard dollar sarflagan.
Avvalroq NATO harbiy qo‘mitasi raisi Styuart Pich Xitoy harbiy modernizatsiyasining “hayratda qoldiradigan” tezligi haqida ogohlantirgandi. Pichning ta’kidlashicha, NATOning barcha a’zolari vaziyatni tahlil qilib, ittifoq uchun Xitoyning harbiy ambitsiyalari nimani anglatishini hal qilishi zarur.
Izoh (0)