Buxoro viloyati G‘ijduvon tumanida Majburiy ijro byurosi xodimi qarzdor fuqaro tomonidan haqorat qilinib, unga jarohat yetkazildi, deb xabar beradi “Xalq so‘zi online”.
Ma’lum qilinishicha, MIB G‘ijduvon tumani bo‘limi davlat ijrochilari Ya.Holiqov va U.Ergashev qarzdor Trans Atlas MChJdan 28 million 409 ming so‘m soliq qarzini undirish to‘g‘risidagi Davlat soliq inspeksiyasining ijro hujjati asosida xizmat olib borgan. 2021-yil 10-mart kuni fuqaroni chiqarilgan qaror bilan tanishtirish, shuningdek, qarorga asosan qarzdorning mol-mulklarini ko‘zdan kechirib, xatlash ijro harakatlarini o‘tkazish maqsadida MChJ rahbari S.Aslonovning yashash manziliga borilgan.
Ta’kidlanishicha, qarzdor o‘zini nosamimiy tutib, davlat ijrochisi Ya.Holiqovni nojo‘ya so‘zlar bilan haqorat qilib, tan jarohati yetkazgan.
Mazkur holat bo‘yicha Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 2-qismi bilan jinoiy ish qo‘zg‘atilib, jinoyat ishi sudga yuborilgan.
Jinoyat ishlari bo‘yicha G‘ijduvon tuman sudining hukmiga ko‘ra S.Aslonov aybdor deb topilib, oylik ish haqining 20 foizini davlat daromadiga undirish sharti bilan 3 yil muddatga axloq tuzatish ishlari jazosi tayinlangan.
Avvalroq Toshkentda MIB xodimi ikki yilda 596 mln so‘mni o‘zlashtirib yuborgani, Andijonda MIB xodimini do‘pposlagan fuqaroga sud hukmi o‘qilgani, Sirdaryoda MIB xodimini kaltaklagan ota-o‘g‘il sudlangani to‘g‘risida xabar berilgandi.
Izoh (0)