O‘zbekiston xalqi ayollarga ko‘proq ovoz beradi. Bu haqda XDP lideri Ulug‘bek Inoyatov 7-avgust kuni bo‘lib o‘tgan partiya markaziy kengashining navbatdan tashqari plenumida ma’lum qildi, deya xabar bermoqda “Daryo” muxbiri.
Plenumda asosiy masala – O‘zbekiston Prezidenti saylovida Xalq demokratik partiyasi tomonidan nomzod ko‘rib chiqildi va Maqsuda Vorisova nomzod sifatida ko‘rsatildi.
Tadbir davomida XDP raisi Ulug‘bek Inoyatov jurnalistlarga partiya nima uchun uning nomzodini tavsiya qilmagani bo‘yicha izoh berdi.
“Biz partiyamizning strategiyasini yangi jihatdan ishlab chiqdik, bu borada juda ko‘p ekspertlar va o‘zimizning faollar bilan muhokamalar qildik. Hozir jurnalistlarni va hammani qiziqtiradigan savol: nima uchun partiya lideri saylanmadi?”. Men o‘ylaymanki, hozir plenumda o‘tirgan 72 ta a’zomizning hammasining yuragida mening nomimni ko‘rsatarmikan partiyamiz, degan hayajon bor edi. Lekin partiya, bilasizki, kollegial organ. Partiyada hamma hamfikrlar birgalikda fikr bildirishi kerak. Biz birlashdik, fikrlashdik va o‘zimizning strategiyamizni tanladik. Boshqa siyosiy partiyalardan farqli o‘laroq, mana, sizlar ko‘rdinglar uchta partiyaning plenumi o‘tdi va ular o‘z liderini tanladi. Lekin bizning maqsadimiz bitta – Prezidentlik saylovlarida g‘olib bo‘lish. Xalqimiz ayollarga ko‘proq ovoz beradi va XDPning siyosiy platformasida ijtimoiy masalalarga ko‘proq e’tibor qaratilgan, shu nuqtayi nazardan qaraladigan bo‘lsa, biz nomzodimizni to‘g‘ri tanladik va biz bo‘lg‘usi prezidentlik saylovlarda g‘alaba qozonishimiz uchun bu bir qadam bo‘lim xizmat qiladi deb o‘ylayman”, — dedi XDP lideri.
Inoyatovning ta’kidlashicha, XDP Prezidentlik saylovida g‘alaba qozonishi uchun katta imkoniyatlarga ega va ushbu saylovdagi faollik o‘z navbatida keyingi parlament saylovlariga katta zamin yaratadi.
“Xalqimiz butunlay boshqacha fikrlaydigan bo‘ldi. Mana shu saylovlar orqali biz yana bir bor demokratiyani, ochiqlik va oshkoralikni namoyon etamiz. Bu yangi O‘zbekistonning eng katta yutug‘i bo‘ladi va biz o‘ylaymizki, partiyamiz tomonidan ko‘rsatgan nomzodimiz, albatta, yuqori o‘rinlarni egallaydi va biz bu saylovlarda katta imkoniyatga egamiz. Bu saylovdagi faol ishtirokimiz biz uchun keyingi parlament saylovlarida katta zamin bo‘lib xizmat qiladi deb o‘ylaymiz”, — dedi XDP raisi.
O‘zbekiston Prezidenti saylovi kampaniyasiga 23-iyul kuni start berilgan. Mazkur saylovlarda ishtirok etishi uchun 5 ta partiya – “Adolat” SDP, “Milliy tiklanish” DP, O‘zLiDeP, XDP va O‘zbekiston Ekologik partiyasi o‘z nomzodini ilgari surish huquqiga ega. Hozirgacha barcha partiyalar o‘z nomzodini tavsiya qilib bo‘ldi. XDPdan tashqari O‘zbekiston Prezidentlik saylovida ishtirok etish uchun Ekopartiyadan partiya raisi Narzullo Oblomurodov, “Adolat” SDPdan partiya yetakchisi Bahrom Abduhalimov va MTDPdan esa partiya raisi Alisher Qodirov, O‘zbekiston Liberal-demokratik partiyasi tomonidan mamlakatning amaldagi rahbari Shavkat Mirziyoyev nomzodi ilgari surildi.
Ma’lumot uchun, O‘zbekiston Prezidentligi uchun saylov 24-oktabr kuni o‘tkaziladi. Saylov jarayonlariga 300 milliard so‘m va shundan har bir nomzodga 3 milliard so‘mdan pul mablag‘i ajratilishi belgilab qo‘yilgan.
Izoh (0)