Бухоро вилояти Ғиждувон туманида Мажбурий ижро бюроси ходими қарздор фуқаро томонидан ҳақорат қилиниб, унга жароҳат етказилди, деб хабар беради «Халқ сўзи online».
Маълум қилинишича, МИБ Ғиждувон тумани бўлими давлат ижрочилари Я.Ҳолиқов ва У.Эргашев қарздор Транс Атлас МЧЖдан 28 миллион 409 минг сўм солиқ қарзини ундириш тўғрисидаги Давлат солиқ инспекциясининг ижро ҳужжати асосида хизмат олиб борган. 2021 йил 10 март куни фуқарони чиқарилган қарор билан таништириш, шунингдек, қарорга асосан қарздорнинг мол-мулкларини кўздан кечириб, хатлаш ижро ҳаракатларини ўтказиш мақсадида МЧЖ раҳбари С.Аслоновнинг яшаш манзилига борилган.
Таъкидланишича, қарздор ўзини носамимий тутиб, давлат ижрочиси Я.Ҳолиқовни ножўя сўзлар билан ҳақорат қилиб, тан жароҳати етказган.
Мазкур ҳолат бўйича Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) 2-қисми билан жиноий иш қўзғатилиб, жиноят иши судга юборилган.
Жиноят ишлари бўйича Ғиждувон туман судининг ҳукмига кўра С.Аслонов айбдор деб топилиб, ойлик иш ҳақининг 20 фоизини давлат даромадига ундириш шарти билан 3 йил муддатга ахлоқ тузатиш ишлари жазоси тайинланган.
Аввалроқ Тошкентда МИБ ходими икки йилда 596 млн сўмни ўзлаштириб юборгани, Андижонда МИБ ходимини дўппослаган фуқарога суд ҳукми ўқилгани, Сирдарёда МИБ ходимини калтаклаган ота-ўғил судлангани тўғрисида хабар берилганди.
Изоҳ (0)