Tokio—2020 Olimpiadasida erkin kurash bo‘yicha bronza medalini qo‘lga kiritgan Bekzod Abdurahmonov hamda ushbu musobaqada O‘zbekistonning bayroqdori bo‘lgan taekvondochi Nigora Tursunqulova turmush qurmoqda. Bu haqda Bekzodning ota-onasi va opasi “Sport TV” telekanalidagi ko‘rsatuvda ma’lum qildi.
Ularning so‘zlariga ko‘ra, to‘y Olimpiada o‘yinlari tugagandan keyin bo‘lib o‘tadi.
Ma’lumot uchun, Bekzod Abdurahmonov 1990-yilning 15-martida Toshkentda tug‘ilgan. U faoliyati mobaynida 2 martadan Osiyo o‘yinlari va Osiyo chempionatida g‘olib bo‘lgan. 2018-yilgi Jahon chempionatida esa bronza medalni qo‘lga kiritgan. Shuningdek, Bekzod Rio—2016 Olimpiadasida ham ishtirok etgan.
Nigora Tursunqulova esa 1999-yilning 4-aprel sanasida Jizzax viloyatida tug‘ilgan. U taekvondo bo‘yicha 2018-yilgi Osiyo chempioni hisoblanadi. Shuningdek, Nigora Jakartada o‘tgan Osiyo o‘yinlarida bronza medalini qo‘lga kiritgan.
Qayd etish o‘rinli, bungacha ham o‘zbekistonlik sportchilar o‘zaro oila qurgan holatlar bo‘lgan. Xususan, og‘ir atletikachi Ruslan Nuriddinov 2020-yilning fevral oyida sinxron suzish bo‘yicha terma jamoa a’zosi Almira Mamatkazinaga uylangandi. Shuningdek, gimnastikachi Oksana Chusovitina va yunon-rum kurashi ustasi Bahodir Qurbonov ham oila qurgan.
Izoh (0)