Farg‘onada bir ayolni aldab, uni Turkiyaga fohishalik qilishga yubormoqchi bo‘lgan ikki ayol qo‘lga olindi

Farg‘onada odam savdosi bilan shug‘ullangan ikki ayol qo‘lga olindi. Bu haqda “Sevimli” telekanalining “Zamon” informatsion dasturida ma’lum qilindi.

Ma’lum bo‘lishicha, viloyatning Quva tumanida ikki nafar ayol Turkiyadagi shaxs bilan oldindan til biriktirib, bir ayolning ishonchiga kirgan holda unga Turkiyadan yaxshi ish topib berishlarini aytib, o‘ziga bildirmagan holda uni fohishalik qilishga yubormoqchi bo‘lgan.

Bosh prokuratura huzuridagi departamentning Quva tumani bo‘limi hamda Farg‘ona viloyati IIB xodimlari tomonidan o‘tkazilgan tezkor tadbir davomida ushbu shaxslar Toshkent xalqaro aeroportida qo‘lga olingan.

Hozirda holat yuzasidan departamentning Quva bo‘limi tomonidan ikki fuqaro va boshqalarga nisbatan Jinoyat kodeksining tegishli moddalari bilan jinoyat ishi qo‘zg‘atilgan.

Avvalroq Xorazmda uch nafar qizni Dubayga fohishalik qilish uchun jo‘natishga uringan shaxslar qo‘lga olingani, Samarqandda 37 yoshli ayolni 1000 dollar evaziga Turkiyaga fohishalik uchun sotgan erkak ushlangani, Navoiyda 3 yoshli farzandini 60 mln so‘mga sotmoqchi bo‘lgan ayol ushlangani, Navoiyda fuqaroni fohishalikka yollab, uni Qirg‘iziston orqali Turkiyaga jo‘natmoqchi bo‘lgan ayolga jinoyat ishi qo‘zg‘atilgani hamda Toshkent xalqaro aeroportida fuqaroni xorijga fohishalik qilish uchun jo‘natayotgan 20 yoshli qiz va uning sherigi ushlangani haqida xabar berilgandi.