Фарғонада одам савдоси билан шуғулланган икки аёл қўлга олинди. Бу ҳақда «Севимли» телеканалининг «Замон» информацион дастурида маълум қилинди.
Маълум бўлишича, вилоятнинг Қува туманида икки нафар аёл Туркиядаги шахс билан олдиндан тил бириктириб, бир аёлнинг ишончига кирган ҳолда унга Туркиядан яхши иш топиб беришларини айтиб, ўзига билдирмаган ҳолда уни фоҳишалик қилишга юбормоқчи бўлган.
Бош прокуратура ҳузуридаги департаментнинг Қува тумани бўлими ҳамда Фарғона вилояти ИИБ ходимлари томонидан ўтказилган тезкор тадбир давомида ушбу шахслар Тошкент халқаро аэропортида қўлга олинган.
Ҳозирда ҳолат юзасидан департаментнинг Қува бўлими томонидан икки фуқаро ва бошқаларга нисбатан Жиноят кодексининг тегишли моддалари билан жиноят иши қўзғатилган.
Аввалроқ Хоразмда уч нафар қизни Дубайга фоҳишалик қилиш учун жўнатишга уринган шахслар қўлга олингани, Самарқандда 37 ёшли аёлни 1000 доллар эвазига Туркияга фоҳишалик учун сотган эркак ушлангани, Навоийда 3 ёшли фарзандини 60 млн сўмга сотмоқчи бўлган аёл ушлангани, Навоийда фуқарони фоҳишаликка ёллаб, уни Қирғизистон орқали Туркияга жўнатмоқчи бўлган аёлга жиноят иши қўзғатилгани ҳамда Тошкент халқаро аэропортида фуқарони хорижга фоҳишалик қилиш учун жўнатаётган 20 ёшли қиз ва унинг шериги ушлангани ҳақида хабар берилганди.
Изоҳ (0)