Aksariyat xotin-qizlar go‘zallik qurbonlik talab qiladi, degan fikrda. Ammo tor kiyim va poyabzallar, og‘ir aksessuarlar salomatlikka jiddiy zarar yetkazishi ularni davolash esa oson bo‘lmasligi mumkin.
Uchli tufli
Uchli tuflilar, poshnali oyoq kiyim singari xavfli bo‘lishi mumkin. Bunday modelning uch qismi torligi hisobiga oyoqning barmoqlari siqilib qoladi. Kun davomida vaznning og‘irligi tovonga tushib, qavarish va barmoqlar orasidagi nervlarning shikastlanishiga olib kelishi mumkin.
O‘lchami katta poyabzal
Aksariyat hollarda yulduzlar qadoq va shishlarning oldini olish uchun tadbirlarga 1-2 o‘lchamga katta poyabzal kiyadi — qisib turmagani hisobiga qon aylanishiga xalal bermaydi, deb o‘ylaydi. Ammo bir marta kiyish o‘rtasida farq bor. Gap shundaki, katta o‘lchamli tufli qadam tashlashning o‘zgarishiga ta’sir qiladi. Yurganda kattaligi hisobiga oyoqdan chiqib ketishi, oqibatda barmoqlar qayrilishi mumkin. Bu esa qadoq paydo bo‘lishi, shuningdek, tovonlar keyinroq esa tizza, bel va bo‘yin bilan bog‘liq muammolarga olib keladi.
Plastikdan ishlangan shaffof oyoq kiyim
Shaffof, plastikdan ishlab chiqarilgan poyabzal mashhurlar orasida keng tarqalgan. Chiroyli ko‘ringani bilan bunday modelni hadeb kiyavermagan yaxshi. Havoni o‘tkazmagani sabab poyabzalning ichki qismida zamburug‘ va bakteriya ko‘payishi uchun mos muhit hosil bo‘ladi. Oyoqlar bir zumda terlaydi va qadoqlar paydo bo‘ladi.
Baletka
Oyoq kaftlari uchun unchalik qulay bo‘lmagani uchun bunday model ham tizza va qomat bilan bog‘liq muammolarga olib keladi. Qolaversa, tag qismi ingichka bo‘lgani sabab yurganda yerdagi tosh va o‘nqir-cho‘nqirlar seziladi. To‘satdan qirrali narsani bosib olish esa xavfni yanada orttiradi.
Og‘ir taqinchoqlar
Yirik ziraklar obrazni chiroyli ko‘rsatgani bilan, hamisha nimagadir ilinib qolib quloqni shikastlanishiga olib kelish xavfi yuqori bo‘ladi. Qolaversa, og‘irligi hisobiga quloq tortishishi va cho‘zilishi bu esa terining erta qarishiga olib kelishi mumkin.
Haddan ortiq tor libos
Juda ham tor bo‘lgan libosni doim va uzoq vaqt davomida kiyish terini bezovta qilishi bu esa o‘z navbatida infeksiya tushishiga olib kelishi mumkin. Shuningdek, haddan ortiq ravishda tanani siqqani uchun qon aylanishini yomonlashib, oshqozon-ichak traktida muammo kuzatiladi.
Bel qismi tor shimlar
Bel qismi yuqori turadigan, tor shim va jinsilar oshqozonda muammo paydo bo‘lishi hamda kislotali reflyuks (kislotaning oshqozondan qizilo‘ngachga kirib borishi)ga olib kelishi mumkin. Bunday kiyim kiygan odam o‘tirganda kamar ichaklarga bosim o‘tkazadi. Tor kiyim siqib turganiga o‘rganib qolgani uchun mushaklar unchalik faol bo‘lmaydi. Organizmda muammo kuzatiladi va bu bel sohasida og‘riqlar keltirib chiqaradi.
Izoh (0)