Toshkentda 8 oylik o‘g‘lini 10 ming dollarga sotishga uringan ayolga sud hukmi e’lon qilindi

2021-yilning mart oyida Toshkentning Yangihayot tumanida ayol o‘zining 8 oylik bolasini 10 ming dollarga sotayotganida qo‘lga olinib, holat yuzasidan jinoyat ishi qo‘zg‘atilgandi. Oliy sud matbuot xizmatining ma’lum qilishicha, ayolga 5 yilga ozodlikdan mahrum qilish jazosi tayinlandi.

Qayd etilishicha, sudlanuvchi N.J. bundan ikki yil avval issiqxonada ishlab yurganida bir erkak bilan tanishib qolgan va 2020-yilda undan undan o‘g‘il farzand ko‘rgan. O‘sha vaqtda uning 2018-yilda tug‘ilgan farzandi ham bo‘lgan. Yangi tug‘ilgan farzandning otasi uni boqish uchun imkoniyati yo‘qligini bildirib, bolani boshqa birovga berib yuborishini aytgan.

Sudlanuvchi ayolning sud jarayonida bildirishicha, dastlab u chaqalog‘ini boshqa birovga berib yuborishni xohlamagan, ammo farzandini boqish uchun imkon topolmagan. Oradan vaqt o‘tib, unga 8 oylik farzandini 10 ming dollarga sotish taklifi tushgan va u bu taklifni qabul qilgan.

Yangihayot tumani vasiylik va homiylik organi mutaxassisi Zulfiya Imomovaning so‘zlariga ko‘ra, ayoldan farzandini nega sotgani sababi so‘ralganda u yashash joyi yo‘qligi, ikki farzandini boqolmayotganini, birovning uyida mol boqib kun kechirayotganini ta’kidlagan.

Zulfiya Imomovaning aytishicha, ayolning birinchi farzandi ham kimdanligi noma’lum. Bolalarga tug‘ilganlik haqida guvohnoma ham rasmiylashtirilmagan. Ushbu guvohnomalar olib berilib, bolalar mehribonlik uyiga joylashtirilgan.

Sudda ayol o‘z aybiga qisman iqror bo‘lgan. Unga 5 yilga ozodlikdan mahrum qilish jazosi tayinlangan.