ITSV: “O‘zbekiston Prezidentiga yo‘llanayotgan murojaatlarning 40 foizi kredit masalasi bilan bog‘liq”

Prezident Shavkat Mirziyoyevning tadbirkorlar bilan ochiq muloqotidan avval ishbilarmonlarning tashabbus va muammolarini o‘rganish maqsadida 2021-yilning 20-iyul kuni tashkil etilgan Respublika shtabi hamda call-markazlariga shu paytgacha kredit masalasi bilan bog‘liq 5 mingdan ziyod murojaat kelib tushgan. Bu haqda Investitsiyalar va tashqi savdo vazirligining bosh mutaxassisi Dadaxon Jumaniyozov “Daryo” muxbiri Mirolim Isajonovga bergan intervyusida ta’kidlab o‘tdi.

“20-iyuldan 3-avgustgacha yo‘llangan jami 10 ming 623 ta murojaatdan deyarli 40 foizi kredit masalasi bilan bog‘liq. Murojaatlar mazmuni shundayki, fuqarolar kreditga hujjat topshirgan, ammo bankdan qarz chiqishi kechikyapti, kredit olish bilan bog‘liq hujjatlarda kamchiliklar bor, deb qaytarib yuborilmoqda. Asosan, mana shu kabi murojaatlar yo‘llanyapti.

Shuningdek, bankdan kredit olib, pandemiya davrida qiyin ahvolga tushib qolgan ishbilarmonlar kredit muddatini uzaytirish masalasida yordam so‘ramoqda. Bunday muammosi bor tadbirkorlarning kredit muddatini uzaytirishga yoki ularning aylanma mablag‘iga qo‘shimcha kredit ajratib, ularni har tomonlama qo‘llab-quvvatlashga tijorat banklari tomonidan harakat qilinyapti.

Shuni alohida qayd etish kerakki, shtabga barcha tijorat bank vakillari jalb etilgan. Ular bank faoliyatiga taalluqli har bir murojaatni individual tarzda o‘rganib, qonun doirasida ijobiy yechim topishda ko‘maklashishmoqda”, — dedi Jumaniyozov.

Uning ta’kidlashicha, o‘n to‘rt kun davomida biznesni moliyalashtirish, kreditlash va subsidiyalash bo‘yicha 5 mingdan ortiq murojaat kelib tushgan. Shundan 2 mingga yaqini hal etilgan. Hududlar kesimida murojaatlar ko‘pligi bo‘yicha Surxondaryo (589 ta), Qashqadaryo (470 ta), Samarqand (440 ta) viloyatlari yetakchilik qilmoqda.